الشاهد الله اذكرنا سوى الحب

كل عام والجميع بخير ونأسف على الغياب والتأخير
ولعلي أورد لكم أبيات ردية قديمة شوية بيني وبين أحد الاقارب العزيزين
حيث خيموا فى الربيع عند تمير مجموعة من الاصداقاء والاقارب العزيزين ومعهم صاحبي الذى رد على ونحن نكنيه بالذيب الاشهب وكان بجانبهم تلة فقال الاشهب للرفاقة ياجماعة نبي نسمي هذا المكان بركبة الاشهب لأن هذة التلة تشبه ركبتي.....المهم صوروا وأٍستأنسوا وأرسلوا لي الصورو وتفاعلت معهم لجمال المكان والمناظر ولطيب الجمعه وأرسلت لهم نفس الابيات ولكن الذيب الاشهب شكله حللها بطريقة مختلفة فرد علي ثم رديت عليه لأزيل الالتباس ورد وقد تفهم الموضوع.....


رسالتي للأصحاب

الارض خضرا والمطر فوقها صب=والنار تسعر فى حطبها تشبه
مجلس رجالن فيه تسعد وتطرب=صحبة نشاما كل وجهن تحبه
وسوالفن عذبه ومزحن مهذب=وفنجال بنن كل منهم يصبه
بأيمن تمير حول ركبة الأشهب=أجمل مكان يمدحه من يطبه

رد الأشهب

تكفا علي يانسيم الهواء هب=أطفي لهيبن بالحشى زاد شبه
لو ما عليه عجلت رحمة الرب=والله ما سوالي من العيش حبه
ذكرتني يوم المطر فوقنا طب=واليوم أرضي ممحله تقل صبه
ولعتني توليع طيرن ليا نب=وأقرشتني إقراش عجن بدبه
وأنا صخيف القلب ماني ولد ضب=أحس بالمدحه وأحس المسبه

ردي على الابيات السابقه

سطرت لي معنى بقلبن مذهب=ربعه للقلبه هم طبيبه وطبه
وجاني جوابن به علامة تعجب!=أحترت كني تائهن وسك غبه
والشاهد الله ماذكرنا سوى الحب=يقولها اللي ماخشى غير ربه
ما يلحقك شكن ولايلحقك سب=أنت فؤادن بالمحاني نظبه
طير السعد اللي فعلك مجرب=النادر اللي للمهمة ننبه

رد الاشهب

ياراكب اللي لا مشى موخره شب=مع جرهدن يرقى على كل تبه
أشهب شهاب الذيب وأفحج كما الدب=شد الوكالة والحلا مالعبه
يلفي على اللي كل هرجه مهذب=حكيم رأي ومنهجه مايكبه