ديوان الشاعر(بخيتان البشري)

ابني على ساس واشيدي = ماني على ماتقولونه
فالمسألة الطرح تعقيدي = لو جاوز العقل مضمونه
ظنيته الناتج يفيدي = وجمعي خطأ ماتحسبونه
كل ما اعتق الضبط من قيدي = واقول قيده تحلونه
ياخذ مع الوضع تصعيدي = وفالمتاهات ترمونه
ضحيت بالفرح في عيدي =ويموت صمتي وتحيونه
درب الوفا عنه ما احيدي = وليا بغيتوه تلقونه
انتم تمنون ونريدي = اللي انتمنى تريدونه
مفتاح الاقفال في إيدي = صندوقها ماتفكونه
وإعلم ترى الود ياسيدي = معنا على ماتمنونه

بخيتان البشري =
يامرحبابك يابو نواف = في قروب بأمثالكم يفخر
ياراعي الطيب والميقاف = اقولها فالعرب واجهر
دخيل الغانمي =
عسى البقا يارجال اشراف = فقروب بوجودكم مزهر
اوصافكم فالوفا اوصاف = من طيبها للبشر تظهر
بخيتان البشري =
بعد ابتدينا في بني القاف = بحروف لاهل المثل تبهر
بشكي وابى الحكم والإنصاف = قدام الافكار لا تصهر
دخيل الغانمي =
اليا بدأ للقضيا أطراف = والنص من صاحبه حرر
للمشتكي نبدي الإسعاف = نكتب ونختم له المحضر
بخيتان البشري =
حسب القوانين والأعراف = الناس بالناس ماتِشهر
لكن مع كثرة الاطياف = في وقتنا الوضع متشنهر
دخيل الغانمي =
المشتكي فالزمن وش شاف ؟ = وخلاه يبهر من المنظر
لابد للنص حرف ايضاف = حتى يقرب لنا المجهر
بخيتان البشري =
ثوب الصفا لاغدى شفاف = هل لابسه فالملأ يطهر ؟
واليا صدم في قلوب انظاف = يثر على كامل المظهر ؟
دخيل الغانمي =
من جرب الناس حب وعاف = لجل البشر فرق فالمخبر
وانته فهذا الامر عراف = تنصى الوفي والردي يخصر

حال المعنا صلف ولهود = والمبتدأ 0 للعنا يصلف
في مشاهد اهله 0 عليه شهود = احوالهم 0 والخبر يخلف

بخيتان البشري =
سلام ماجيب من غزا = ولا حولها للسلام ظهور
سنة على اهله ماينعزى = يحيى بها مايجيه قصور
بحروف معنى لها مغزى = دورة قريبه بعيد تدور
والحي فالاموات ما عزى = موتى فالاحياء بدون قبور
علي عيد =
ترحيب من قلب لك فزى = يبغى يعقب على المنشور
رايتك بالعز منرزى = يامن اخذ للشموخ عبور
فرسم المعاني لكم فرزى = من ساس للمعرفة مذكور
الموت فالحي ماهزى = قلوب غالب عليها الجور
فواز الزويهري =
ترحيب والحرف لك فزى = يامن على الطيبة مخبور
ومن قولك القلب يهتزى = لجل الامر غاية المحضور
للبيرق بعز يرتزى = تعوم ذيك القلوب بحور
ضماير الناس كاليزا = ثمين نادر ويوجد بور

بخيتان البشري =
ياهل الوفا من ثقات رجال = ياللي بنا قدركم قايم
سلام لو هو غيابي طال = في قلبي حضوركم دايم
حفيد الحجيري =
ترحيب والم معه فنجال = كيفه على كيفك ملايم
مده للابطال مد ابطال = ماعندها فالوفا مسايم
بخيتان البشري =
ياصارفين الذهب مازال = ماغيركم للذهب سايم
صوت الوفا لا صدع زلزال = يضرب في بحر الوفا العايم
حفيد الحجيري =
الفارس اللي يهاب نزال = الفارس يلومه اللايم
لكن راع المثل وش قال = لايصير جو المثل غايم
بخيتان البشري =
ماكل فوق الفرس خيال = ويحسب فالاموات من نايم
لاصار مابين نون ودال = مايصير حرف المثل صايم
حفيد الحجيري =
يا ندّ ما فيك أدنى جدال = شيهان فأعلى السماء حايم
والمكسب أصله لرأس المال = والفضل للواحد الدايم

بخيتان البشري =
شفتك وفرحت بك عيوني = سلام شرح الخواطر فيه
عسى الكريمين يوحوني = اللي لهم قدر مانحصيه
علي عيد =
ترحيب من بعد شفتوني = من بال صافي لكم نبديه
قرار ياللي تنادوني = راع الوفا مثلكم نوفيه
بخيتان البشري =
في وسط الاخطار يرموني = روحي وقلبي وماينويه
والخوف الايام ينسوني = في درب راس الخطر يطويه
علي عيد =
مقسوم الاقدار مضموني = ماحي عن كتبته تنحيه
من ياخذ الصبر ماعوني = عقله على الصايبة يقديه

بخيتان البشري =
سلام واسألك يا ماهر = وسلام بعد الردد نهديه
هل فالعرب ينجبر خاطر = راعيه كسره تسبب فيه
ماهر ابو خالد =
ترحيب مثل المزن ماطر = للي سلامه لنا يقريه
مادام ذاته سبب ظاهر = للكسر من ذاته ايداويه

بخيتان البشري =
عيد السنة مثل عيد العام = قامت شواريه تقفاني
الناس تنسى مع الايام = وانا ياخالد على ماني
خالد اللهيبي =
وآلله ياخال ماتنلام = كلامكم هز وجداني
ادعي له الواحد العلام = يجزاه رحمة وغفراني
بخيتان البشري =
المشكلة فالشراب السام = اليا غشى واحة اوجاني
في زمرة الجمع جاء 0 قدام = يستأذن الروح واعياني
خالد اللهيبي =
يبقى الامل فالذي قدام = مرسى علا بحر الاحزاني
وهذي صروف الحياة احلام = مهما صفت عمرها فاني

باقة حروف المثل فاحت = ريحةّ شذا عطر مبناها
بعد بروق الشعر لاحت = في سبكها وحبك معناها

كيف العمل في دموع العين = اللي لها فالبكا راحه
خوفي على عيوني اثنتين = فيها العمى يفرد جناحه