ديوان -الشاعر محمد الكنيـــــــــــدري

تخاصمو والمورث حي= وصارو فى قمة تباعدهم
وطوو شروط الاخوه طي= والناس تنظر وتنقدهم
وكلن موقد بنار الكي=تحرق صهارج مرقدهم
اثر الشويب ماعنده شي= يقضون به حال يسعدهم

بعض البشر حظها تعبان= ويسد له جوع باندومي
ويرقد قبل ترقد الورعان= ولاقام مايقلها قومي
ووقت التفاهم هو الغلطان=وهيه لها الحق متمومي
يبغى التعامل لها باحسان= بوصية الرب ملزومي
جويد صرحه من السيسان=ومعود النفس بالصومي
ولامات تذكر ياكان وكان= وتنساه ياذاك مرحومي

طبعأ ليس كل النساء

انظر لها نظرة العابر= واحسب لها يوم بتعدي
وخلك لحكم القدر صابر= لاتسير كافر ومرتدي
ولاتحقر الناس وتكابر= مايدوم لك عهدك الوردي
واسعى لخوة فتى شاطر= وقت اللوازم لها قدي
وكلمتك لاتكسر الخاطر= وتاخذ من القول وتودي
ولاسالت الارض بالماطر= غض النظر والزم الحدي
ماكل زهره لها عاطر= بعض الزهر ذايب الندي
وتخربه بيتك العامر= وتنقد بك الناس بالنقدي

كيف نتهنى براحة نوم= وترك حياة السهر والاه
ونقوم قبل الطيور تحوم= ونسعد بساعة نزول الله
ماحي يضمن حياته دوم= ورزق البنادم حسب مسعاه
ياكم راحو كبار القوم= وقت اللوازم رجال ادهاه
وكلن بذكره هنا مرحوم= وهناك علمه فمن انشاه
ماقلت قولي وانا معصوم= بالذنب طرفي كثير ابكاه
ولاني بعرفي قضيت لزوم= دربي غويته قبل لابداه
هذي نصيحه تعم عموم=بابلغ رسالة شعر وانقاه

القلب ماله طبيب اجراح= يعطيه وصفة دواء تشفيه
والا مهندس عطل واصلاح= يقدر يهندس هوى مضنيه
ابغاه يرجع على المفتاح= لاعاد ياخذ ولا يعطيه
باقي حياتي بعيش افراح= ودرب الهوى بشطبه والغيه

وقلبي اللي مغيب الشمس= سافر به الشوق متشامل
ويخيل صوت النجر والحمس= ومجلس من الانس متكامل
وصباب كيف الهوى بالخمس= بالقن والذوق متعامل
يطمس بقايا جروحك طمس= فيه الوفاء والرضاء شامل

لي سيد ماهو على العاده= متغير الحال والاحوال
مدري سبب ناس وراده=والا فى قصده لي الاهمال
زود لي الحال بزياده=من طول بعده شغلي بال
وقلبي على نار وقاده= مابين حرقة جفاء واعلال

يامن ملكها فى روض حماه= ولايعرف الحب وفنونه
ماضن تلقى هناء وياه= جعل العمى يتلف عيونه

انته السبب فاللآلم والجرح= وانته عذابي واهاتي
وانته الآمل للهناء والفرح= وانته مرادي وهقواتي

من خصنا بالوفى نوفيه= ومن عافنا ماحسبناله
ومن غاثنا بالحمى نحميه= ونعادي اللي تعدواله
واللي طلبنا نقص نبريه= ونرجح بكيله ومعداله
لانقول ماذا وكيف وليه= ونضيع الحق فى جداله
ولادق واجب وجب نسريه= ماهمنا ليل واهواله
حروب وقت النداء لبيه= من سابق العهد واقباله