ديوان الشاعر(بخيتان البشري)

فايز المحيسن=
سلام والحرف ساق الحرف=يـم العـدود الرهـاويـه
اغرف وحنا معك نغـرف=من فيض بحـر الهجينيـه
خابرك دكتـور ماتصـرف=ألآ بوصـفـات طـبـيـه
أتعبت رجلي بكثـر اللـف=والجـرح ماطـاب بالكيـه
بخيتان=
يامرحبا بعد ما شـرف=يـم الديـار النحاويـه
الله عسى ربنا يالطـف=وجروح الاكباد حصريه
مهما بدت يالخوي تنزف=تبرى على حول حوليـه
وانته عن اسبابها اعرف=وحروفها لـك مقريـة
فايز المحيسن=
اعلم ترى صاحبك كُلف=يرسل دعاويـه ناريـه
عسا البقا مثلكم ينصف=مايحكم احكـام غيبيـه
يالين كل الدعاوي تكف=ونصدر لها احكام جذريه
مطلوب شاهد مع محلف=ولا تقبل احلول وديـه
بخيتان=
مادامت إن الامر مكلف = وجتنا دعاويك خطيه
حضر لي الخصم ومعرف= والحق مافيه ماويه
اذا ثبت حق لك نوقف = خصمك والاحكام فوريه
وبلا خصم حجتك تضعف = والعدل معروف مازيه
فايز المحيسن=
ياقاضي ياللي حكم بالعُرف=واصدر لنا احكام مرضيـه
كنّه في جوف الصدر مشرف=وينظر على خافـي النيـه
وشلـون قـدام لآ نوصـف=خافـي معانـي ومخفـيـه
اصبت كـل الـذي نهـدف=ولاخطيت هـذي ولا ذيـه

ماجد الاحمدي=
للان الوضع مهما صار = للان والقدس محتلة
ماينفع الشجب والإنكار =المعتدي فرد في شلة
والبعض وقع عليه اقرار=مخالف الشرع والملة
الحل ؟ يالقايد البيطار= ياباهي الحسن والطلة
بخيتان البشري=
الوضع مادام فيه حصار=وفيه القوانين مختله
ملزوم تحتاط للاخطار = وتبحث عن علاج للعلة
الحق راعيه ياهودار = ينصر ولو طال به ذله
جواب 0 من حر نسل احرار = ياقرة العين فالحلة

ابن وازن=
مادامت انّا على بالك=أكيد انت على بالـي
سلام ماهو لك ألحالك=للكل فالملتقى الغالي
بخيتان =
لاطبت بيطيب لك فالك = ويطيب لاطبت لي فالي
ترحيب بالكل وبحالك = مادمت في صرحنا العالي
ابن وازن=
تسلم على طيب موالك=ويصفى لك العد وزلالي
وان كان جوك بيهنالك=دون المطر غيم يهنالي
بخيتان =
تهنأ لما يلايم احوالك = وجوّي به ادرى ويحلالي
والآن ماعاد يبقالك = غير الجزل كان يبقالي
ابن وازن=
الشين والنون مع..دالك=نهاية الجيم في دالـي
عد العدد كـم تهيالـك=وعد لك كـل معدالـي
بخيتان =
اربعمية سرعة ارسالك = وستين تردده آلي
وثلاثة اطقم لتجوالك = بين الكواكب و تجوالي
ابن وازن=
أطفي ردارك انا قبالـك=ياملبس الوصف خلخالي
غالي في حلك وترحالك=ثابي لك العـز منزالـي
بخيتان =
حسب الذي بان فاقوالك = البسته الوصف بقوالي
قدام ساهر لا يصحالك = ركز معي زين وصحالي
حنين الايام سوالك= مركبّ الروح لو جالي
وختامها الوصل بوصالك = يدوم لك دوم ميصالي

اللهُ أكبر وأكررها = اللهُ أكبر وازيد اعيد
اللهُ أكبر يامكبرها = فالعيد منك الجفا ياسيد

سهران مع القمر والليل =ونجوم وسط السما زِينه
فالبر على سمين وهيل =والحرف ياتيك في حينه

مع ناقص العقل والمنحط= ارفع مقامي ولا ادنيه
حتى على النفس ما اغلط= سفيه ما احاول اجاريه
لاجله في قن العرب يسقط=ضعيف والطايلة تعضيه
برقبته الحبل له يخرط = خانق لنفسه بخرط ايديه

خفوا ترى غيابكم طوّل = بالحيل ماهو كما العادة
والفكر سارح ويتجول = كل يوم اراجع به عيادة