كن الشباب وشايب القوم غيرنا

كنا الشباب وشايب القوم غيرنا

كنا الشباب وشايب القوم غيرنا = ولابد من بعد الشباب نشيب
نقطف من الدنيا البهيّة أورودها = في ضل غصنٍ بالحياة رطيب
واليوم شبنا والهقاوي تكودنا = أصبح علينا ما نبيه صعيب
أنكرت دارٍ عقب أهلها تغيّرت = للبوم بأطراف الرسوم نحيب
دارٍ لحيٍّ من وطنهم ترحّلوا = كانوا بها بعض الزمان قريب
وقفت فيها لين جفّت عبايري = حتى أقبلت شمس النهار تغيب
أقيس بالواقع سنينٍ تصرّمت = على سكونٍ بالخيال رهيب
كناّ بها نرقد لياروّح الدبش = بليلٍ نسيمه للرقود يطيب
في ليلةٍ ظلما ضياها نجومها = والجدي فوق الفرقدين رقيب
واليا ألذن المذّن هجرنا منامنا = كلن على حيا الصلاة أيجيب
كلامنا أحلا من المصفّأ من العسل = عليه من در البكار حليب
وقلوبنا أصفا من سحابٍ تزبّر = بعد الأصيل مكلّلٍ عجيب
شرق السراة وغرب من نجد الانجد = عليه من شمس العصير نصيب
يامن بنا عن مذهب السّوّ جارنا = لوجارنا طول الزمان ايغيب
وجاراتنا نقصر هوا الطرف دونهن = سلمٍ لهلنا من قديم عريب
نحفظ مواجيب ألوفا لهل ألوفا = يوم الردي بالواجبات أيخيب
يسوقنا وجه النداء لهل النداء = ناخذ ونعطي والكريم يجيب
اليوم اشوف الوقت عقّد حواجبه = قامت اسهومه بالظهور اتصيب
كم واحدٍ يمشي على غير ما يبي = من ظلم الأدنى صاحب الغريب
ومن لا تراعي قدر الاجواد شيمته = ما له بتقدير الرجال نصيب
تمّت وها جوس الروابع يسوقها = سوق الفراق لمفردات حبيب
هذا وصلاتي مع سلامي على النبي = ما سال من وقع السحاب شعيب

صح لسانك
على هالقصيده القيمه الجزله

بانتظار جديدك

شاعرنا القدير : نداء الغيداني
هلابك لقد تشرفت في حضورك وتعليقك
ولاعليك زود لاهنت : تحياتي وتقديري

صح لسانك مليون على القصيده
والله يعطيك العافيه
بيض الله وجهك

صح لسانك صح لسانك صح لسانك يابوبدر

قصيدة جزلة على بحر لايجيده الا القله من الشعراء

اسجل اعجابي بهذه المقطوعة الادبية الرائعة

واليا ألذن المذّن هجرنـا منامنـا
كلن على حيـا الصـلاة أيجيـب
كلامنا أحلا من المصفّأ من العسل
عليـه مـن در البكـار حلـيـب
وقلوبنا أصفا من سحـابٍ تزبّـر
بعـد الأصيـل مكلّـلٍ عجـيـب

وتقبل جزيل احترامي

قصيده مليانه لله درك



صح الله لساانك


وتقبل مروري يا الغالي



ودمت بخير

نافع الحربي


صح لسانك على هالقصيده



ابيات جزله تصوير جميل وحكمه

تقبل تحياتي

صح الله لسانك
ولاهنت
وسلم فكرك وبنانك
دمت برعاية الله وحفظة

الله الله الله

جزاله في اللفظ وجزاله في المعنى وجزاله في التصوير

قصيده رائعه من شاعر رائع

	المشاركة الأصلية كتبت بواسطة الحب الباقي

	صح لسانك مليون على القصيده والله يعطيك العافيه بيض الله وجهك

الحب الباقي
هلابك اخي العزيز وصح بدنك
ووجهك ابيض لاهنت
تحياتي وحترامي