ديوان الشاعر(بخيتان البشري)

بخيتان البشري=
سلام يقعد معـك ويقـوم = يأكل ويشرب معك ويبات
لأهل الوفا بالوفا ملـزوم = ومن راح بالطيبة له جات
حفيدالحجيري=
ترحيب يصحى معك وينوم = يسرح ويضوي معك بالذات
للي يمـد الوفـا موسـوم = بالطيب من وافي المـدات
بخيتان البشري=
يبقى الصفا والنقا معـدوم = في غير مثلك رجال ثقات
كيف اتقاضى من المحشوم = سجين فكري طليق الذات
حفيدالحجيري=
ما شفت للطيب طير يحوم = إلاّ أنت يا عالي الهـدات
ما ينوخذ حـق للمظلـوم = من ظالمه دونمـا اثبـات
بخيتان البشري=
كيف أكتب نهاية المقسوم = واللي ظلم ما انكر الحالات
هو الدواء و دائي المحتوم = وأنساه ذآ اصعب الصعبات
حفيدالحجيري=
يا صاح ما ينعطى محـروم =ما به دوا بـدون تأثيـرات
والي رضى ظلم يرضى اللوم = ملزوم يصبر على القسمـات
بخيتان البشري=
زودت فوق الهموم همـوم = ومعالج أهل الهوى جرعات
كلاتنـا للبعـاد خـصـوم = ويبقى الأمل كامل الأوقات
حفيد الحجيري=
حسب الذي قلت يازيزوم = أبديت لك صافي النيات
لو لك دوا عندنا مخدوم = مافي يدينا سوى الدعوات