ديوان كسرات الشاعر ماجد عبدالله الجدعاني الحربي ( أبومديدة )

يسعدني ان اكتب لكم هذا اللحن بين أخوكم ماجد أبومديده من جهه
والشاعر أحمد العمودي من جهه أخرى

أنا تأثرت بالطالِع=اللي وصف موجز الحاله
سلام من طرفي الدامِع=مُرسل للأصحاب في رساله
ماقفك دايم معي رائِع=وتبرهِن القول بالقاله
ترحيب مايمنعُه مانِع=عن كاسب الطيب والطاله
دايم رحاب العرب واسِع=مايرصدُه شيك وحواله
حيآ معك فازع وجازِع=وحيآ على المجتمع عاله
الفرق بين البشر واقِع=منهم رجاجيل وحثاله
ومادام فيهم عضو نافِع=ماأظن الأوضاع بطّاله
ردك على المشتكى قاطِع=مردود عسر وخيّاله
لكن سبل الوفا ضايع=بالحيل بيدين محتاله
ماني عن الحُكم متراجِع=والزاد بُه بُر ونخاله
واللي في درب الوفا باتِع=الطيب ياخذ مِنُه باله

ويصحابنا سامحونا

إخواني وأعزائي في هذا الصرح الغالي
السلام عليكم ورحمة الله وبركاته
يسعدني أن أطرح بين أيديكم هذا اللحن
والذي جرى بين
ماجد أبومديده من جهه
والشاعر أحمد العمودي من جهه أخرى
الجمعه 29 /7 /1429

ماجد وعندك فكِر وعيون=واللي نشوفُه تشوفونه
بعض العرب يجهل القانون=وألآ نظرهُم يغضّونه
إن كنت فالمسآله مغبون=أنا الذي زايد غبونه
بعض العرب يشهِر المضمون=والبعض مِنهم يكِّنونه
إن أخفوا العِلم أو يبدون=ماهمنا مايقولونه
لكِن باحكامهم يطغون=وماكُل ميراد يِصلونه
الحُكم يبغى رجل موزون=كُل الخلايق يزكُّونه
ومادام حُكامنا يخطون=الحق لازِم نِقِف دونه
لقيتهم كلهم يدرون=وسايرت كُل من يدارونه
أقدِّم الشهد فالماعون=وبالطين والرمل يحثونه
بعد الذي كان كيف يكون=وذوب العسل مايصونونه
عزيز هذا العطا لايهون=دوِّر علي اللي يودّونه
درّجت الأقدام هون بهون=في درب ممشي ويمشونه
أزروا معي للهدف يصلون=والقلب زادت بُه حزونه
نعلم بأن الحياه شؤون=ونواسي القلب في شؤونه
الدون يبقى مكانُه دون=على الخطا لاتماشونه

ويصحابنا سامحونا
أخوكم
ماجد عبدالله الجدعاني الحربي
(أبومديده)

من أخوكم ماجد ابومديده
عن منتديات ينبع النخل
يسر منتديات ينبع النخل الرسميه
ان تنقل لكم وعلى الهواء مباشره الرديح المقام حاليا بجده
يوم الاربعاء ليلة الخميس الموافق 27/7/1429
بمناسبة زفاف
الشاب الشريف أشرف بن عبدالكريم العياشي
بقصر نوف للأفراح بجدة
انتظرونا
من الصابيه ومع هذه السهره ,,,,,,,,,تابعونا
شارك في الرديح
صف ينبع النخل يمثله الشاعران
الشريف محمد بشيبش وعطية الله الفدعاني
صف ينبع البحر يمثله الشاعران
احمد الدبيش وفوزي الرفاعي
صف جدة يمثله الشعراء
عبدالعزيز بنيه وماجد ابو مديدة وجباره العروي
وياسر الكبيدي وحسين الشريف
لحن ليحان

جينا وفاء والوفـا مطلـب=وهـذا هدفنـا وعنـوانـه
سـلام والطيبـه تحـسـب=لكـل واحـد فـي ميزانـه
تشريفكـم عندنـا مكسـب=يـا ربـة القيـل واركانـه
ترحيب ما شي على المذهب=راجـح ولا خفـت اوزانـه
لأجل الوفاء للوفـي ينسـب=والان حنـا فـي ميـدانـه
ترحيب وسط الفضاء الأرحب=باللي حضر وإحتمـى شانـه

واستمر اللحن بين صف ينبع البحر وصف جده

القلب مكتوب لـه يتعـب=اللي توالـت بـه احزانـه
ويعيش حال الفراق الصعب=كل مفتكـر يـوم خلانـه
مـا للفـؤاد المعنـا درب=لعـلاجـه الا بسلطـانـه
من فيه سالـم ولا جـرب=ولا شرب كـاس حرمانـه
كم افتقد من عزيز محـب=يصعب على القلب نسيانه
واليوم عنا توارى وغـب=فـارس تسيـد بميـدانـه
جرح المودين مـا يقطـب=كم عين ناحت على شانـه
مثلك لنـا قلـوب تتعـذب=لا غيب الوقـت فرسانـه
راح الذي في المثل منصب=ومحسوب واحد من أعيانه
ذاك الذي في المعاني عذب=أديب في القيـل وألحانـه
ذكرى البطل ذاك ما تحجب=اللي منـه حـاز نيشانـه
له نهج مـوزون ومرتـب=بس أخلفوا نهـج بنيانـه
فاللي ذكرتوه ما أستغـرب=لجله لحق سابـق أزمانـه
واليوم صار المصافا حرب=الكل عنتر علـى حصانـه
مادام قـن الصفـا غـرب=ناقف سوى ضـد عدوانـه
والذنب يحسب على المذنب=اللـي تسبـب فخسرانـه

وأنـكـسـر هذا الـلـحــن
(لــحــن ســـــلام)

أنظـرودقـق بواقعـهـم=في نفس الأخلاق متفقيـن
ما فيـه عاقـل يراجعهـم=يكون صاحب أمانه وديـن
يلقي لك البـال سامعهـم=اللي من أسبابهم شاكيـن
وأهل العدل من طبايعهـم=تصبر لمنْ الحقيقه تبيـن
عنـدك أمانـه ودايعـهـم=لو ا نداعي نداعـي ميـن
لا يضيع ليًَه هدف معهـم=عندي أمل فيـه فالباقيـن
يجـوز خـدَاع خادعهـم=وصار يلعب على الحبليـن
وقَـع جنـابـك وقَعـهـم=وأصبح يراوغ على الجنبين
أول لهـم رأي نافعـهـم=ويحطهم في المكان الزيـن
واليـوم جفـت منابعهـم=ماعندهم بعد عين وعيـن
في نفس موقعك موقعهـم=ما همنا من بكى الباكيـن
كلاً لـه حقـوق تدفعهـم=والحق ما يرضي الإثنيـن
أصل المكـارم صنايعهـم=يبقى لهم من بعدهم ديـن
الله بـالأخـلاق رافعـهـم=ما ينزلون المكان الشيـن
أحبابنـا ويـش يقنعهـم=وكلآ على خط مختلفين
ضاع المثل في مطامعهـم=خرجت منهم خلـيََ يديـن

وإنكسر هذا اللحن
(لــحـــن زمـانــيــن)
المشتكـى مـن ينبـع البحـر

طرفي منامـه منـه مسـروق=وسارقـه مهتـنـي بالـنـوم
والمبتلي كيـف يبغـى يـروق=مـادام نومـه منـه محـروم
بلا سبب مـا ابتلـى مخلـوق=ولا لقي فـي المنـام خصـوم
وطرف السهر ما يشوف شروق=مادام تحجـب سمـاه غيـوم
كلـف عليََـه عظيـم الشـوق=أصيـر فـي لازمـه مـلـزوم
اللـي فـؤادي منـه محـروق=من جانبه ما صـدر مرسـوم
إن كان شوقك عليـه حقـوق=والـود مـا بينكـم مقـسـوم
أمشي معه بالرضـى والـذوق=حتـى يجـي للتراضـي يـوم
ارقـى معـه وارتقيبـه فـوق=ويردنـا الـواقـع المحـتـوم
والقى عنايـه معـه مطبـوق=قلبـه مـن المرحمـه معـدوم
شتـان مـا بينكـم وفــروق=لانـهـا فالعـلـوم عـلـوم
ومنته على ملايمـه محقـوق=ولا حـي يقـدر عليـك يلـوم
وحنا ما ندري عـن المـدروق=اللـي بسـد الخفايـا يحـوم
وما دمت فالمركـز المرمـوق=لا بـد يرجـع لكـم مرغـوم

وأنـكـســر الـلــحــن
(ويـا اصحابـنـا سامحـونـا)
اخواني حان وقت صلاة الظهر وانتهى الرديح الذي عشنا به معكم اجمل اللحظات
متمنين للجميع وافر الصحة مع المعذرة عن التقصير وسامحونا
إدارة منتديات ينبع النخل الرسمية
تحياتنا

لحن بين ماجد أبومديده من جهه
والشاعر الرائع
قابل بن فرج البشري من جهه أخرى
الإثنين الموافق 4/8/1429

بعد حصولك على الدوري=من وسط قلبي وأخذت الكاس
سلام من بين جمهوري=يامُنتهى الذوق والإحساس
محسوب في ورود وصدوري=يامِبدع الحرف ياحسّاس
يامرحبا ردها فوري=يسمع صداها جميع الناس
هبْ الهوى وإعلن حضوري=على جناح الأمل والياس
وكل ماأقول إنتهى دوري=يرُدني للهوى نِسناس
درب الهوى درب مخطوري=ماتجهلُه ياصليب الراس
إمشي على عِلم مقروري=ولاتتبع الظن والهوجاس
ماكان عقدُه معي صوري=مسطّرُه بالذهب والماس
المِشكله جرّح شعوري=واللي جرحني قويْ الباس
العلم به عِلم مقطوري=ومافيه مبنى بليا ساس
راجِع لهم كل منشوري=وإقرا الذي داخل الأقواس
شكيتلك مِن عنا جوري=عُقب إطلاعي على القرطاس
ومابين جرحي ودكتوري=تآزمت والفؤاد إنحاس
مادم ماجيت محظوري=وبيناتكم مادخل دسّاس
أنا على حسب منظوري=لفراقهم دنت الأجراس

ويصحابنا سامحونا

آمّنْتك الروح وأشواقي=تصونها مثل ماآصونك
أظهرّت لي ودك الناقي=وبانت خيانتك في عيونك

عُمر الوفا مايعوِّد نقص=والنقص مِن عادة المايل
ياطيب غالي ومايرخص=الشك بيناتنا زايل

قلبي عليه الآسى زايد=ومن جور قلبي سقيت الكون
تغثبر العِّد والوارِّد=كُل يوم يرمي في جوفه لون

في حساب الأيام دورّنا=بين العقل والجهل ساعه
لكن قِنعنا وعذرّنا=يوم أصبح الوقت شمْاعه

لاتحسبِّني مثل غيري=ياساحر الناس بعيونك
مِن كُثر حُبي وتقديري=سِرت أكره اللي يحِّبونك

بعد التحيه والإحترام
أحب أدرج هذه الخاطره المتواضعه وهي للإطلاع فقط
عسى وعلا أتنول رضاكم وإستحسانكم
الجمعه 29 /8/1429

أنا أحترِم راي حُسّادي=وأحقاد بعض القلوب السود
لجلي موثِّق مع أودادي=مِشاعر الوِد للمودود

أخوكم
ماجد عبدالله الجدعاني
(أبومديده)