ديـوان الشاعر / نفاع محمد السهلي ابوفـــرح

.
.
.

على ضفاف الشواطي ذيـك = باقي صدى ضحكتك والهمس
ماملت امواجها طاريك = ولااشرقت من بعدك الشمس

.
.

الى قناة الســاحه
.
.

عاجل جوابي وبه ابيـات = مني الى كـادر الساحـه
يامعزبين الـردا هيهـات = ماضرنـا كـلاب نباحـه
اسيادكم من قديم اوقـات = متقلده العـز ووشاحـه
حنا هل الطول والصولات = لاصفق الحـر بجناحـه
حرابة الترك وقتٍ فـات = ماهمها اذنـاب مرتاحـه
ناطا على خشومها لاجات = للعلم فزعـه وصيّاحـه

.
.

مع الشاعر نمر حرب
.
.

نمر حرب=
يا معاتب النمر لا تلومه = النمر دنيـاه عاصيتـه
ماهو على مايبي يومه = حتى الوناسه مجافيتـه
ابوفرح =
النمر مابانت علومه = ليته يوضح لنا ليته
راع المواقيف فلزومه = لويطلب الروح لبيته
نمرحرب=
الشرح مفضوح مفهومه = والعد يرويك لا جيتـه
لكن تبشـر بمعلومـه = الحي ليته رجـع ميتـه
ابوفرح=
ارزاقها الناس مقسومـه = وآجالها ملوك حاصيتـه
واللي رحل وانتهى حومه = نطلب مـن الله تثبيتـه

خاطره

.

رد على تساؤل احد الاخوان

.

.

من لايداري على دنيـاه = ويبذل لها اسباب تقنعني
لايذم الايام فيمـا جـاه = امره وهو باالامر معني

يااللي تمرون ماتردون = بعض الحكي صعب تطنيشه
انتم عن القيل ماتدرون = والا على روسكم ريشه

العيون السووود
.
.

أمنتلك يالعيون السود = وارخصتلك مابقى مني
ماكان ظني يجي مردود = طيـبي على عكس ماظني

ماااااضي لنا يالياليـنا
.
.
.

ماضي لنا ياليالينا = ايام فيها صفا مع ود
نبكي عليها وتبكينا = والا نقفي وعنها نصد

مع الانيق عبدالعزيز الزويهري
.
.

ابوفــرح
.

حسب الطلب من ضميري جيت = اسأل هـل العـرف والمخبـر
اللي لهـم فالمعانـي صيـت = دايـم علـى حسهـم يكـبـر
لاخالـف الوقـت والتوقيـت = مُغـرم علـى الصـد مايقـدر
كيف يتعايـش بـلا تشتيـت = ويصفـي الـجـو لاعـكـر

عبدالعزيز الزويهري
.
.

سمعت حسك و لـك لبيـت = من بعد ما شاقني المنظـر
ما دمـت لدروبنـا مريـت = منا استلم كامـل المحضـر
عيش الأمل لو منه قاسيـت = و الياس لو داهمك تخسـر
يا عل تلقى الصبر لك بيـت = و تعلن لنا الوصل في المنبر

مع الشاعر وليف الشوق ( عبدالله اللحياني )

ولـيـف الـشـوق

سهران ليلي مـع الافكـار = تـودي العقـل وتجيـبـه
حتى اصبحت حالة المحتار = صعبة وضاعت مطاليبـه

أبـــوفــــرح

شبـيتلـك ياوليـف النـار = واشهرتلك سيف توميبـه
عجل ل(نفـاع) باالاخبـار = قبل الهواجيـس تسريبـه

ولـيـف الـشـوق

اشرحلك الحاصل اللي صار = ان كان عندك دواء جيبـه
القلـب لـف الديـار ودار = عيـا يلاقـي مطاليـبـه

أبـــو فـــرح

ماقـدر اقديـك فالمشـوار = واوصفلك عـلاج تبريبـه
قـدام لاتكشـف الاسـرار = والظـرف تقـرا مكاتيبـه

ولـيـف الـشـوق

عطيتـك العلـم يابيطـار = لاتتـرك الـدرب وتسيبـه
عطنا افـاده عليهااقـرار = ومثلك طويلـة تجاريبـه

أبـــو فـــرح

مابان في شاشـة الـرادار = الا قمـر وانـت غاديبـه
لوكان بيني وبينـه جـدار = اعرفه واعـرف اساليبـه

ولـيـف الـشـوق

سعيت كلي امل واصـرار = لين اصبح القلب محريبـه
تغيرت حسبتـي بااصفـار = وبانـت خسايرمكاسيبـه

أبـــو فـــرح

طولتها والعلـوم قصـار = ولا اكسيتها ثوب تمشيبـه
حتى لها تلفـت الانظـار = والكـل يفتـل اشانيـبـه
سوق الغلا حكـر للتجـار = ومن عنده ريال يشريبـه
واللي ماعنـده ولادينـار = يشوفلـه شـي يلهيـبـه

ويااصحابنا سامحونا

مع الشاعر عاشق الأصاله

.
.

عاشق الاصاله ( حمدان الوافي )

سلام مني بعطر الهيل = ياشيخ مشتاق لعلومك
لاجاك خلك فنصف الليل = يزهمك صحاك من نومك
قالك مسافر وصلني ايميل = يبكي وغرق لك هدومك
حاصل حصلي يهد الحيل = ابغى افاده بمنظومك

ابوفـرح

يامرحبا وانت وافي كيل = عذبه معانيك من يومك
فرقا المواليف ناور وويل = لواثرت فيك ماالومك
والدمع لو هو سواة السيل = ارضى بقسمك ومقسومك
واللي كتب لليالي ميل = قادر يفرج لك همومك