ديوان الشاعر نعيم عابد السيد ( القلب الدافئ )

سلام تسليمة الإسلام=حسب الشريعة على المله
اعداد ما هبت الإنسام=واعداد عطر الزهر كله
ترحيب يا عازف الأنغام=اقلط على الكيف والدله
ايام راحت وجات ايام=والقلب شرواك محتله
ذبحني اللي عليه لثام=ابوه لا ابوه من قله
يرسل علي الغرام اكوام=وانا تلوعت من دله
اعتب على طرفك الحوام=الي من العام يرسله
من بعد جته المنايا اسهام=ما ينفعه سيف لو سله
عنيد راسي واشد حزام=واللغز فالعين من حله
يرمي سهومه ولا ينلام=والمدعي يونس العله
لو كنت ماشي معه بنظام=لغزه فالأعيان تفطن له
لكن تدرى ورى الأحلام=والريق الأحلام ما تبله
آنا السبب عشت فالأوهام=ومنيت قلبي على وصله
والآن يا قاضي الفهّام=وش ظنك القلب بنقله
قله كفايه كفايه اسقام=يا قلب خل الغضي خله
ما نابك إلا قهر والآم=ولا عاد لك دمع وتهله