ديوان الشاعر/ سعد المحمدي

(سعد المحمدي)
يافاهم الناس صايبها مرض توه
مدري له علاج والا ماله علاجي

عامين اكافح وباء الاوهام وانوه
وزيت للقى مثل حجاج حجاجي

وحيد اصارع وسلم لي على القوه
وسلاح ردعٍ يخافه كل منعاجي

وين انت ياللي تحل العقد ومفوه
مايرفع حجاج لي ويرخي حجاجي

لاشاف وجه الصحيح يصيح ومشوه
مايرخي الراس خايف لوم وحراجي

الحق مصباح يوضي بالدجا ضوه
ويورد الضاميه بالقيض هداجي

والكذب ياللي يناسب جوكم جوه
مافيه ياهل الوبا مسرا ومعراجي

الناس ماعاد فيها مر ومروه
يفالح الراي دوب اليوم مخراجي

كلام شاعر وعنده راي وجروه
كثر عشاء لذيابه تصبح انعاجي

ماعاد باقي حرارة دم وحموه
حقايقٍ لو هرج بي كل هراجي

(مجاراة مساعد البلاجي)
سعد سمعته يجر الصوت ويموه
مدري علامه تقل مخنوق بسياجي

ياحيلة الله تقل ماعد به خوه
الناس جاها بلا من كثر الازعاجي

لاترخي السمع خلك عالي علوه
شاط البحر مايهزه كثر الامواجي

وانته رجل تفهم الموضوع وفحوه
لاتطرد الهرج ماب الهرج منهاجي

اركد وخل الرمي يثور بجبوه
منته مكلف بساقة كل دواجي

ان طعت شوري تريح والبناء طوه
مافيه داعي تشب النار بالصاجي

ريح ضميرك عن المردود بعنوه
لاتهاجم الناس ثم تصير هلباجي

اقبل نصيحة محبن صاغها توه
من راس مساعد لكم والجد بلاجي

(رد سعد المحمدي)
البارق اللي تغدى مانهمر نوه
صوت الرعد نسمعه والبرق لعاجي

بيني وبينه مساري لليل وتوه
بتبوك وخيل برقه سد الافلاجي

والدرب لاصاربه هوه وراى هوه
مترعرجٍ لامشيته تقل كرباجي
جنبت مع درب ثاني مجهل بدوه
لو جابني من ورا عسفان وسواجي

ياراعي الثوب الابيض تحته اموه
ياخذ من الارض لون ولون من داجي

ماكل حاجه تبي يامساعد افتوه
وماكل سعدون عندي يرجع عواجي

البارحه بين ذيب وبين سعلوه
وطيت روس الافاعي لسعد راجي

وناديت بالصوت لشليان وشلوه
ويست والباب له حطيت مزلاجي

عسى الرسايل على الوتساب مقروه
ماتنحفض يامساعد وسط الادراجي

(مجاراة سليم الجابري)
سمعت شعر الجزال وجتني اجروه
ماني عن الجزل ياهل العرف منعاجي

مساعد وسعد وقلت الخوه الخوه
اطب وعرف مدخال ومخراجي

شعاني القاف الابيض قادحٍ ضوه
وسريت ليل الرجى ومولع سراجي

وعديت قمت جبل وموايق علوه
ضلعن يشابه لونه للجبل عاجي

وجاريت الاثنين والموضوع بطروه
وموضوعهم بينهم مرجي للقى راجي

وان كان يبغون قاضي فذ ومفوه
يواعدوني وانا بالحق ماجاجي

حربي وعندي لهم تقدير وحموه
سعد جفن عين والبلاجي حجاجي

(رد سعد المحمدي)
كررت كل القوافي جعلك عبوه
تنسفك نسف ابن لادن ذيك الابراجي

اما تخليك شاعر يندرى سوه
والا سحبنا نواط الشعر والتاجي

امزح معك مانبيها غيض وجفوه
نبغى يقود المواصل سلك ديباجي

ماودي ان المعاني لعب تلهوه
ابغى المعاني تشادي صب ثجاجي

لاصار يالجابري بالشعر هذروه
عليه مايصيبني يالغالي اخلاجي

ماطال يسمج وسمع المستمع روه
ولا اعف شعر النبط وكتب له افراجي

واليا عصاك المولع بالهوا كوه
اللي تقل يااسليم طلع خراجي