ديوان الشاعر ( راشد الزهراني ) المحيط

نبرة حزن هزة الخافق = اللي عليه الضلوع صفوف
من مصدر إحساس متوافق = عبر عن إحساسي المكفوف

ساعة صفا منك تكفيني = اعيشها مستريح البال
تنعش فؤادي وتحييني = وتجدد الود والآمال

اتصوره في لجين الما= واشرب واصدّر وانا ضامي
وبالشمس والضل والضلما = حتى بمنامي واحلامي

وش تنتظر يا عذاب الود = لما تجنا على روحي
مرات تنزل ومره تشد = وترحل وتترك لي جروحي
كأن هذا الأسى مايسد = اللي حصل ضد مصلوحي
ودايم جروحي عليا تجد =وفي علاجها يطول مشروحي

هاجس من الخوف والحيره = يمر داخل خفايا الروح
كلما يجي للزمن سيره = اللي منه خاطري مجروح

ابو سالم الرحال=
ياراشد الشعر وينك فيه=لك عدة ايام ماشفناك
لاغاب مثلك اخو نبكيه=لإنه يهمنا شرواك
امير الكسرة =
يافاقد الاخ ومناديه = ماحلا جميل الوفاء في نداك
يابيه يمكن ظروف البيه = متساعده يعترض معناك
راشد الزهراني=
شكر ووفا اقدمه واهديه = وانثر عبيره هنا وهناك
للأحمدي عايش يوافيه = راعي المواجيب والادراك
وناصر صديقي عليه اهديه = واقول له ربنا يحماك
يامقدم الطيب وموفيه = تسلم وتسلم لنا يمناك

ماحيلتي غير دمع العين = اللي ذرفته بعد فرقاه
راح الهنا والكلام الزين = من يوم قفا وودعناه