الشاعر القدير سالم البشري لك مع التحية

عذب المراوي=
ماهو ياسالم على المكشوف = تستخدم الطيب وتعلم
البعض باقي عليه كشوف = سدادها فحوزة معلم
سالم البشري=
سالم علي بطيبته معروف=كل من يعرْفه بها سلّم
وما كشف ألاّ وله مصفوف=الله عسى مانت متظلّم
عذب المراوي=
جاتك حروف العتاب ضيوف = عساك للبحث متولم
فتش في كل الملف وشوف = وانصف بالامثال متكلم
سالم البشري=
ماني فبحث الخفا مكلوف = الجرح راعيه متألم
ولانته عن المشتكى مكتوف=مادمت فاهم ومتعلّم
عذب المراوي=
ماهو خفاء راجع المحذوف = وابحث معي بحث متقدم
تلقى القوى بالضعيف يروف= والوضع تلقاه متأزم
سالم البشري=
في ظرف الامثال شفت صروف=الحذف أبرك لها واسلم
مضمونها جاوز المألوف=ماسر سالم ولامسلم
والحق ماله تعب مخلوف=من حارب بسيف متثلّم
ومعاتب اهل المثل مردوف=راع العقل فيه ما اتحكم
عذب المراوي=
راقي بحرفي علو الخوف = وبالعقل والفكر متحزم
واللي مايبغى المعاني تنوف = عندي من النقد مايسلم
ياسالم اللي حذفت حروف = ماهي مثل لابتك مغنم
وصاحبك ماني عنه مكفوف = اجيه لاجاك متوهم
سالم البشري=
وين العقل طالما منسوف = جسر المعاني ومتحطم
لما تلاقي كبار وقوف = فاسلاكها تمد وتلغم
ماني من اللي يجيب حفوف = ولاّ 00 هوى كل متزلّم
اللي يسيب الدسم مغروف = ماهو على الكيك متندم

صحت السنتكم
والله يـعـطـيـكم الـعـافيـــــــــــة
بيض الله وجيهكم