ردي على قصيدة الشاعر سلطان بن بتلاء

	المشاركة الأصلية كتبت بواسطة الجرح

	لاهنتم وصح الله السنتكم تقبلو التقدير والاحترام وفقكم الله

صح بدنك

وشكرا على مرورك


تحيتي

	المشاركة الأصلية كتبت بواسطة نداء الغيداني

	كل درب فيه خير وفيه طيب ادله=مبر تالي هالزمان الوضع مايصفالي عشت في جيل شبابه هم اساس العله=نزلوا مقدار الامه عقب ماهو عالي ماعلينا من غثاهم من بلاهم كله=مقصدي هو القصيد بهالزمان التالي ياابوسامي شوف وضع الشعر وش وصل له=صار سلعه ماتميز بخسها والغالي وعادتي لاصادفتني بالحياه شكله=ماشتكي ياكود رجلٍ عالي المنزالي لااستحال الحال والحل استحال يحله=مايحال الحال قدمك دامك الحلالي القصيد اصبح عقب ماهو شعور عضله=صار كله طلمسه ومن المعاني خالي بعضهم لوقال مالي بالقصيد ازين له=يحسب ان الشهره بصوره وسكب عقالي مادرى ان الشعر كنزٍ قل من ياصل له=والعزا بشعّارنا اللي كنزهم مازالي العزا منهم وفيهم بس لو هم قله=يحفظون الشعر من قيل الدخيل وقالي الشعر جاء يشتكي لي يانداء من غله=قلت لاتشكي وراك توجه المشكالي صاحبك شعر الوساطه والصحافه عله=صارت اهزاله جزالٍ والجزال هزالي هم لهم مله وانا لي في قصيدي مله=بس انا ماني بساحة شعرهم بلحالي مااذكراني جبت بيتٍ فيه نقص وخله=ولااسرجت بنات ريح الفكر غير جزالي والسبب ماهو مجرد موهبه لاوالله=مصدر الهامي حبيبٍ مسكنه في بالي بانين له في خفوقي ياابوسامي فله=بابطي بقبري وهو في فلته ماانزالي يبطي ولاطل طله ماوراها طله=شوقي الها مثل شوق البيد للهمالي لاابتعد صاب الخفوق هموم ماياون له=اتوجد وجد منهو شاف مالا طالي وجد يهز المشاعر والخفوق يتله=وانظمه شعر وافضفض به و ويش احتال الحشا لولا الشعر والوجد وش يحصل له=الله العالم بدون الشعر ويش يجرالي الشعر يسري بدمي صار في جبله=صار من باقي الوصوف ومن عداد خصالي صاحب مامل من همي وانا ماامله=اشتكي له كل ماصال الزمان وجالي اشتكيتك هم شعر العصر وابغى حله=واشتكيتك هم فرقاء خلٍ اسقم حالي هاك هميني وشوف دقاقها والجله=واعطني رايك وبدل مرها والحالي والولد لاصار درب المرجله مادله= مايفيده لاافتخر في عم والا خالي وهذا ردي على الشاعر سلطان بن بتلاء مرحبا بالخط من سلطان قبل افله=ياهلابه مرحبابه من عزيز وغالي ياهلابه من لسانٍ مانطق بالزله=عد ماتبدي النجوم ومايهل هلالي الرفيق اللي مشى درب الصواب احسن له=يعتبرني معه بالدرب ان قصر وان طالي ابن شيخٍ بالمواقف مايعرف الذله=لابداله درب داسه طيب الافعالي عادته فعل الجماله والوفاء طبعٍ له=من شيوخٍ طيبهم تضربه الامثالي يعرفونه بالشدايد واللقاء قومٍ له=للصعايب والحمول الجايره شيالي ماتوانا شيخ قومٍ دامنا ربعٍ له=لادعانا للملاقاء نهزم العيالي وابن بتلاء لاشكالي كل شئ فدله=ان طلبني في يميني وان طلب من مالي اشتكالي هم شعره واشتكا من خله=واشتكا هم الزمان وكلهن اثقالي قلت له بالله ياسلطان وش تبحله=لايهمك شعر ناسٍ نصهم جهالي القصيد اختار عدله والمعاكس خله=لاتسمع في قصيدٍ جابه الدلالي اقر للي ذاع صيته والملا تفطن له=مثل ابن جدلان والا مرشد البذلالي لايهمك شعر شله تستعين بشله=شعرهم شعر الحداثه جعل ماله فالي يكتبون اللي يبون بساحةٍ منحله=وينشرون اللي يبون ولاعليهم والي ولاتطالع من يحط الواسطه عون له=في مجال الشعر جاءللواسطه مدخالي كل تابع هون يختار البسيط اسهل له=ماتعب في كل صعب ولاشرى بريالي يالسنافي وان شكالك شعر جيلك قله=لايهمه دام مثلك تنتج الاجيالي وقله انك شاعرٍ مبدع وفيه ادله=وقله انك للبيوت الشارده خيالي انت شاعر لك مكان عاليٍ محتله=ماتقول الا الصحيح وتنشد العقالي كل قاف وكل معنى تفتله وتحله=للقوافي والمعاني ناقضٍ فتالي شاعرٍ يزهاك شعرك والفخر كفوله=واردٍ هداج تيماء والحبال طوالي مير سيفك ضد خلك مايجوز تسله=ضد خلٍ للمحبه والوفاء ميالي الحبيب اللي ذكرته ماقريت اسجله=لكن انه عن طريق المعرفه مامالي ماتنكر وانت خلك بالوفاء وافٍ له=الوفاء والصدق دايم عادة الرجالي صاحبك سود الليالي مارضن يصفن له=ولاتسمع هرجة الجهال والانذالي انتبه حبل المواصل بينكم لاتله=لاانقطع حبل المواصل ضاعت الامالي والزمان ان شان ياسلطان وش تزعل له=كل مانزعل يميل وتفرح العذالي

صحت السنتكم
..
..
أسجل اعجابي
..
ويعطيكم العافيه ..
..

صحت الستكم شعارنا

ولاهنتم على هالعذبه

السلام عليكم ورحمة الله وبركاته
سلمتم ودمتم أخواني الشاعرين سلطان بن بتلا+نداء الغيداني على المجاره
.
.
جزله ورائعه وصحت السنتكم
أخوك ابوساره

الشاعرين سلطان بن بتلا

نداء الغيداني



من المساجلات الرائعة التي تستحق التصفح

كل التقدير على ماسطرت إيديكم وطرحت أفكاركم

انا قول صحة السنتكم
والشاعر سلطان بن بتلاء من الشعراء الجدد
ولاكن بدري عليه يشوف الغثى
والشاعر نداء من الشعراء المعروفين وله العديد من القصايد الجزله
ومن يشوف ان الشعر يتعرض لبعض المعضلات يتركه ويرتاح

صحــت السنتكــم
دمتم برعاية الله وحفظة

ياسلام ياسلام
لله دركم
الشاعر/سلطان بن بتلاء
والشاعر/نداء الغيداني
صحت الاسنتكم
والله يعطيكم العافيه..

سلطان بن بتلا
نداء الغيداني
صح الله السنتكم شعراء مميزين

صحت السنتكم وابداعكم الرائع
كلام جميل من الشاعرين
الله يعطيكم العافيه
/
\