ديوان الشاعر ( راشد الزهراني ) المحيط

الله من هم وسط القلب = زايد لهيبه ووهاجه
من حي هجره سلبني سلب = واقفا وانا كنت محتاجه

قلبت في صفحة الايام = اللي بها طيف تذكاري
حصلت فيها فرح وآلام = اللي بها احتارت افكاري

قدام زهر الامل يذبل = ويسير بين الرجا والياس
في قسوة الود كيف اقبل = وكيف اتجنب ملام الناس

هذه الكسرة قلتها في الوالد الذي توفي قبل مدة ليست بالقصيرة وهو يصلي صلاة العصر في الحرم الشريف امام الكعبة المشرفة الله يرحمه ويرحم جميع المسلمين

ساعة صلاة العصر بالذات = اغلا البشر ودع احبابه
وسط الحرم والشهود ثقات = شهدوا رحيله ومغيابه
صاحب ذكر في صلاته مات = سبحان من سبب اسبابه
يكتب له العفو والجنات = مع صفوة الخلق واصحابه

احبابي اللي يحبوني = بحساس صادق وصفو قلوب
منزالهم داخل اعيوني = وفي خافقي ودهم مكتوب

شمس الاصيل ابتدت تغرب = وذكرتني بماضي راح
من واقعه ما قدرت اهرب = ولا من عذابه قدرت ارتاح

عذوبـة الحـرف والمعـنـا = لا صاغها المبدع الحسـاس
ابـدع بمعـنـاه وامتعـنـا = وعشنا معه في صفا واحساس

الود لاسار متسـاوي = يازين عدله وميزانه
تلقاه جراح ومـداوي = يسعفك من دم شريانه

جمعت قطر الندى بيدى = اللي تساقط على الاوراق
وشفت به طيف حبك حى = وكل يوم اشوفه مع الاشراق

انا تصورت هذا الكون = سبحان من صوره وانشاه
وسطه خلق كل جنس ولون = ومن فيض فضله وهب واعطاه