ديوان الشاعر ( راشد الزهراني ) المحيط

ياليل ياليتني داري = قبل اتعنا وقبل اسهر
عن حي ما تهمه اخباري = ولا حن قلبه ولا فكر

ياناس ياللي تلوموني = كفوا الملام اعملوا معروف
اللوم ما يخلف اضنوني = في ود حلت عليه ظروف
منازله وسط مكنوني = وضلوع صدري عليه اعطوف
وذكراه ماتفارق اعيوني = ودايم خياله على يطوف

هاجرت من ديرتي مغصوب = ماهو بكيفي ورغباتي
واصبح على الهجر مكتوب = اعيش به جزء من ذاتي

الله من هم وسط القلب = زايد لهيبه ووهاجه
من حي هجره سلبني سلب = واقفا وانا كنت محتاجه

قلبت في صفحة الايام = اللي بها طيف تذكاري
حصلت فيها فرح وآلام = اللي بها احتارت افكاري

قدام زهر الامل يذبل = ويسير بين الرجا والياس
في قسوة الود كيف اقبل = وكيف اتجنب ملام الناس

هذه الكسرة قلتها في الوالد الذي توفي قبل مدة ليست بالقصيرة وهو يصلي صلاة العصر في الحرم الشريف امام الكعبة المشرفة الله يرحمه ويرحم جميع المسلمين

ساعة صلاة العصر بالذات = اغلا البشر ودع احبابه
وسط الحرم والشهود ثقات = شهدوا رحيله ومغيابه
صاحب ذكر في صلاته مات = سبحان من سبب اسبابه
يكتب له العفو والجنات = مع صفوة الخلق واصحابه