ديوان الشاعر(علي بن عيد البشري)

قلبي من الحقد طهرته = من صغر سني كذا منشاه
على صفى النفس حررته = في قلوبنا البغظ ما تلقاه

حيرتني وانشغل بالي = عليك واصبح افكر فيك
الله عسى خير يالغالي = الله من الشر لي يحميك

بجروحنا جروحك التمت = بنسعالها في علاج يفيد
الناس والله ماهتمت = من اللي نعاني منه ياسيد

اشتقتلك مثل ماشتقتو = وانا اشتياقي لكم زايد
اشقيتني بعد روحتو = مدري متى للوطن عايد

من شوف عيني ذرف دمعي = ولا شاهدو دمعي العربان
اللي منه اختلف وضعي = شفت الذي للملا مابــان

ياناس مدري ولادري ليش = بعناد عاند واعاندني
مدري عناده عناد الطيش = والا تعمدّ يكايدني

البدع/سعد محمد المزروعي=
لي قلب بين الامل والياس=فى الجسم صعبه معاناته
جرح لجاموقعه حساس=والطب زادالتهاباته
ولويعلم الحبروالقرطاس=ماكان بانت كتاباته
وين التقي لي دوى ياناس=والصبرنفذت مهماته
الرد/ابوعيد=
اصبروراع الصبرنبراس=ويداوي الجرح من ذاته
لاتشيل الهم فوق الراس=وتعذبه من بداياته
دواك مع راعي الاحساس=اللي مجهزعياداته
للقلب يسترجع الانفاس=والجسم يلقى علاجاته

لجل ايش هذا القسى والصد = والهجر والبعد ياأنسان
حنين قلبي ملكته جد = يصعب على قلبي النسيان

لاجيت في دار الاجوادي = تلقى الكرم من معازيبه
والمنطق الرايق الهادي = راعيه كلٍ يهلّيبه

ابو عيد=
العاشق اللي يجرالآه = احدن يلومه في آهاته
للكل قلنا بجاه الله = وش يمنع القلب مشهاته
ابو صايل=
مما بك الطرف حدر ماه = ياخال صادق في وقفاته
من لامكم يبتلى بعماه = وبسوء تختم نهاياته
ابو عيد=
هيا اسمع المشتكى ( أدناه )= لك اشرحه من بداياته
آه ..الذي مدلي يمناه = غايب وانا الليل ماباته
ابو صايل=
حالن بكم حل مانرضاه = من بعد بانت شروحاته
لن كان باقي على مبداه = أنضر مع الوقت جياته
ابو عيد=
القلب عايش على ذكراه = لجله سبب في مسراته
أعاني الغلب والمأساه = والبعد زود في حروقاته
ابو صايل=
اللي ذكرته لنا (أعلاه) = إنسان موهب لكم ذاته
يمكن حصل شي مايبغاه= مجبور .. يقطع علاقاته
ابو عيد=
اليوم جاني خبر فحواه = ودي.. كثيره جروحاته
رامي رمى اليوم في مرماه = وطوع على غير رغباته
ابو صايل=
كوكب وموجود في مشكاه = ملزوم يتبع لمشكاته
اليوم لاتعيش في رجواه = لو.. شت دورة مجراته