البــــــارحــــــــــــــــــــــــــــة

،،
،،
السلام عليكم ورحمة الله وبركاته
،،
،،
عسى أن ترتقي إلى ذائقتكم
،،

البارحة في الخبت من دون مدسوس=في جو صافي والهواء حيل جذاب
هجعت في نومي وفي القلب حاسوس=باسبابه آريت العجب والتعجاب
أريت لي أذناب تمشي بلا روس=وأريت لي روسٍ تِمشَّى بلا أذنـاب
وأريت لي حيٍّ على الباب جاسوس=لا يدخـل السـدة ولا يفـارق البـاب
وأريت منه بندقه دون نادوس=وفي محزمه بارود مع حرق شباب
وأريت نابٍ طع في عرقه السوس=وأزرا طبيب الناب لا يعالج الناب
وأريت لي ريس بعد كان مريوس=يامر وينهى في طويلين الاشناب
وأريت من سموه ضرسٍ من ضـروس=ولاشفت له نابٍ ولا شفت مخـلاب
وبعد ما أنا أخذت من كـل هاجـوس=وحطيت لي بيـن الصناديـد محـراب
أيقنت أن الشعر في الـرأس نامـوس=ولا يطوله النامـوس رجَّـال هبهـاب
وعرفت أن السر لا صار مدسـوس=راعيه ما ينصاب لـو كـان منصـاب
وأن الحياة دروس فـي بطنهـا دروس=كل ما قِفَلت كتاب تفتـح لـك كتـاب
هذا وأنا ما خفت من ريس الروس=لا قلت للي يحسب الهرج بحساب
أحب خشمك يافهد طيعني دوس =من ينقلون الهرج ما بيـن الأقـراب
ترى فتحت القوس .. ما بأقفـل القـوس=يالين ما أسمع قولـة الطاغيـة تـاب