انا ياهيه ماقاسيت اقاسي.!!

من القديم ولكم قبلها التحيه والتقدير:

انا ياهيه ماقاسيت اقاسي = من اللوعات واكبر من مقاسي
لبست هموم وقتي كلبوها = ولا خليت منها مايواسي
كبر مالبستني والبستني = هموم الوقت ياهيه القواسي
وانا وياك كلن جاه حقه = من اللشدات واقوى منك باسي
اشوفك ماتحمل مايصيبك = يبين ابناظرك بعد احتباسي
ولو خفيت يظهر ماتخفى = ويزعلني زعلك ان كنت ناسي
علامك ياصحيبي في صحيبك= تزيد الهم وانت اللي تواسي
تبي تلبس علي الحق باطل = وانا افرق ذهبها والنحاسي
ولوهي من هذورٍ شقلاباني = تراي اعدها ظمن الطفاسي
ولكن هرجتك عندي ثمينه = لحيث انك ثمين .. وعز راسي
وساس العز رفقة كل طيب = وساس النقص رفقة كل خاسي
ولا رفقة نقيين الضماير = مثل رفقة رديينن اخساسي
ولا في عرف ابو وجهين مكسب= ولاتقبل صلاةٍ بالنجاسي
اقوله وانت عارف ماتعرف = ومثلك حايزن جوهر وماسي
وانا ياهيه اخفي كل مابي = واشيل ابخافقي كبر الرواسي
واليا شفت الرفيق اضحك واهلي = واليا من غاب زفراتي حساسي
ولكن ياعساها ماتعود = هاك الليله حصل فيها التباسي
وزاد الهم عندي فوق حده = لقيتك بالسفر تبغى اتماسي
طوارف جال ساره والفويلق = مراتيع الصبى وتصير ناسي
نسيت اللي صفالك في زمانك = صفالك يوم فيك الوقت قاسي

..