مع الشاعر القدير القاسي الأول

بخـيـتـان الـبـشـري =
سـلام لمحمـد القـاسـي=يرقى معه للمعالـي فـوق
ياللي لكم قيـس وقياسـي=ومطوقين المعاني طـوق
الــقــاســـي الأول =
يامرحبـا عـد نسناسـي=ياوافي القيـل والمنطـوق
انتم وحنـا علـى ساسـي=مابيننا في الـزوم فـروق
بخـيـتـان الـبـشـري =
تبقى وقدرك على رأسـي=مابيننـا فالوفـا مسبـوق
اليوم مـن زود هوجاسـي=الفكر عيّا معـي لايـروق
الــقــاســـي الأول =
نعرفك من نـار مقباسـي=نيل المكاسب لكم معشـوق
ونكان بك حـال حساسـي=الان سوق المطايا سـوق
بخـيـتـان الـبـشـري =
من خيرة النـاس جُلاسـي=شرواك يالصاحب المرموق
والمال ماسبـب اتعاسـي=كل البلا من غرام وشـوق
الــقــاســـي الأول =
الان ياصقـر قرنـاسـي=واجه وقوع الحدث برفوق
وابـدا تعاملـك بسياسـي=بالصبرتكسب أجر وحقوق
بخـيـتـان الـبـشـري =
اخذت فالصبـر مرواسـي=ولافاد في حالة المخنـوق
ضيع شُعوري مع احساسي=اللي فؤادي معه محـروق
الــقــاســـي الأول =
ذا حـال مالـوف لناسـي=أهم شي صاحبك موثـوق
لن كان من صيغة الماسي=تقناه ماتعرضـه فالسـوق
بخـيـتـان الـبـشـري =
لولاه كاتم علـى انفاسـي=بطيب اصله وحسن الذوق
ماكنت فالأمـر محتاسـي=قانيه واشكي معه من عوق