مع الشاعر القدير أحمد العمودي

بخيتان البشري=
سلام من صادق إحساسي=يرقى معك للمعالي فوق
ياللي لكم قيس وقياسي=ومطوقين المعاني طوق
أحمد العمودي=
ترحيب وانته علي راسي=ياللي لكم في ضميري شوق
اناسوات الجبل راسي=منك انتظر جيد المنطوق
بخيتان البشري=
شرواك له قدر نوماسي=عسى البقا يارفيع وذوق
أنا كما الصاعقة باسي=اشكي عليكم أسى وحروق
أحمد العمودي=
أسمك مسجل في كراسي=والبيع والمشتري فالسوق
مادام ملبوسك اللاسي=وش هو سبب قلبك المحروق
بخيتان البشري=
اسمي علم كان متناسي=عاتق شرى بيعته معتوق
مشغول فكري وهوجاسي=القلب عاشق فقد معشوق
أحمد العمودي=
لاتسلم القلب للآسي=اللي تناساك يامخلوق
انساه مادام هوناسي=ترى لقلبك عليك حقوق
بخيتان البشري=
ماكان في يوم لي قاسي=اخذ المسائل معي برفوق
ياستاذ مغصوب من ناسي=يسعون في دربنا بفروق
أحمد العمودي=
بفتيك من واقع مراسي=وماأملكه من خبر موثوق
مادامت الأمر متواسي=والود مابينكم مرموق
لوأصبح الوضع حساسي=مايصبحون العوازل عوق
خليك صبار وسياسي=وكل شي بعد الصبر ملحوق