صــاحـب الشيشه والملــتــزم

صــاحـب الشيشه والملتــزم

لك الحمد يا منان يا حي يا قيوم= على أنعمك والهدي يارب للمله
صبورا ً ورزقه للتقي والطغات يدوم= له أذنوبنا تصعد وهو نازلاً فضله
والأعمار عنده قدرها كل شي محتوم= وعنده مكن ّ الغيب مفتاحه وقفله
هلا مرحبا بشهر الهدى والكرم والصوم= قدومه تباشيره بدا الناس تفرح له
عسى الله يبلغنا شهرنا صحاح عزوم= ونأمل في التوفيق والعون والكمله
نصوم النهار وحين وقت القيام نقوم= ونكمل بقدرة ربنا فرضه ونفله
رحمه ومغفره وعتق للحازم المحزوم= وليلةٍ بألف شهر وخير تكتب له
يـُعـَد الذي ما يغنمك يا شهر محروم= شـُغـِل بالمتاع الزايل وبعد في غفله
حياته غدت ما بين لهو وسهر والنوم= ويقضي ليالي الشهر كامل مع مثله
طيوراً توقّع جانب المحرقه وتحوم= على قدره المخلوق يطلع وينزل له
سبحان الذي قسّم عقول العباد قسوم= وكلا ً على مثله تجد مجتمع شمله
ومنهم عزيز النفس يا مـُكـْرَم أو مكروم= تلاحظ مهاب وقدر في قوله وشكله
ما ندري بقي في العمر عام أوشهر أو يوم= قدّم قبل ياجي يوم ما عاد به مهله
وإذا قيل للناس أجمعوا ندفن المرحوم= وش أخذت في المزود لدار الدهر كله
يا من في البلوت لياليا ً هازم ومهزوم= تبربر على الشيشه ومن حولك الشله
تذكّر اذا الليل انتهى بك وسرى القوم= وش اللي كسبت إلا التعب والشيش علـّه
حياتك مرار ٍ في مرار ٍ وشرب سقوم= وإذا جاء المرض ينسونك الصحب والخله
وإذا ما ذكرت الأمس زاد الهموم هموم= تقول أمس يا شين أمس لو ميـّت ٍ قبله
ولا يزورك إلا منهم أهل التقى معلوم= تعوّد تقول درب العلى كنت ما أدله
ترى الخير له في منظر الخيرين وسوم= عن الكاهل المثـقـل يشلون من حمله
أنظر في الشباب العابد الفاهم المفهوم= الواحد بنور الله تقول لابس ٍ حلـّه
حياة ٍ هنيه باينه مظهرا ً وهدوم= ونور الوجوه لو النظر طال ما مله
يا الشاب السليم أبعد عن الصاحب المشؤم= خوف الصاحب الساحب يجرّك على فلـّه
ولا تشاركه يوما ً في الشرب والمطعوم= ما عمرك سمعت أذبابة ٍ تطعم النحله
وجسم ٍ سليم ٍ سار في واديا ً محموم= يعوّد سقيم بشربه المويه الضحله
لا يمكن تجد عقلا ً سوي في جسد مسموم= ولا سار في درب التلف شخص في عقله
جزا الصائم الجنــّات ورحيقها المختوم= وربي يكافي كل فاعل على فعله
ما أخفى ثوابه ربي إلا وهو معـظـوم= فماذا توقّع من يد المغدق الجزله
تفكـّر في الريان والصايمين قدوم= تفتح لهم مصراعيه وغيرهم ما تفتـّح له
تذكـّر وقوف الناس في الحشر المزحوم= وترجوا تكون مع من الصوم يشفع له
تفكـّر بيوم وعالم ٍ بالعرق ملجوم= وترجوا أمان العرش وتكون في ظله
تذكـّر قصاص الموقـف الظالم ومظلوم= تعود الحقوق إلى أهلها وإيضا ً الزله
تذكـّر إذا فوج ٍ إلى الميمنه مأموم= وللمشئمه فوج ٍ وللخزي والذله
تذكـّر إذا قيل إذهبوا فايزين سلوم= وكلا ً دخل جنات له ملكها وأهله
تذكـّر إذا الناس بجنات النعيم نعوم= جنات ٍ وأنهار وأقصور ورضا الله
عملنا قليل بصدق والعمر مر حلوم= عسى الله يعاملنا بلطفه بدل عدله
تمت بذكر الله وصلـّوا على المعصوم= عدد ما أجتمع غيم السماء وأنـتـثـر وبله

الشاعر / ابو هزاع
بانـــــــــي المعانــــــــي