مساجله مع الشاعر/ مساعد غزاي البهيمه

قصيدة الشاعر/ مساعد غزاي البهيمه الحصني

ياعلي شرهات الجماعه علينا=اثقل من جبال الحجاز وصخرها
من مصدرٍ ماثوق منا وفينا=وانته على هقواتهم فيك وارها
يامنتهى شكواي ذرب اليمينا=اكبودنا كثر المجامل وقرها
والقاله اللي همها مقتفينا=اظن شرهتها على من حضرها
حاول مدام ان حلها في يدينا=قدام تنشر بالجزيره صورها
وليا تفرق حبها ماقوينا=في كل حال نلمها ونحصرها
يرقص لها الشيطان وابن اللذينا=ويروح ولف قلوبنا في خبرها
اسمع رعد واخيل برقٍ رزينا=على علاوي نجد يذكر مطرها
سيله لحى الوادي وعل البطينا=جرَاف سيله قام يركب وعرها
جانا خبرها عسوس ماهم ثنينا=فوق اربعين وكل عين ونظرها
كلٍ ذكر ما شاف علمٍ يقينا=ماشافت عيونه لغيره ذكرها
وخايف يعقب السيل ديم وغشينا=وتفوت منا فرصةٍ ننتظرها
يالصوقعه ما ودي اخسر حدينا=باسباب نزغات الرجيم وقشرها
اسندت لك وانته بحرزٍ مكينا=واكيد قبل اجيك عندك خبرها

وكان هذا الرد مني على قصيدة الشاعر مساعد الغزاي

يامرحبا يامدله الغانمينا=ترحيبةٍ يفخر بها من شهرها
من ضامرٍ لك فيه قدرٍ ثمينا=في ضف نفسٍ حظها ما عثرها
والكوثر اللي من فراته روينا=نزَح عن النفس العليله كدرها
متسلسلٍ من راس هيف السمينا=حي البيوت وحي منهو صخرها
والشرهه اللي من لحانا والينا=أغلى علي من العيون وبصرها
منهم نطيب ومن وفاهم وفينا=نسل الحرار اللي ينومس ظفرها
للي رحل منهم بياض الجبينا= والحي نفسه دون ربعه نذرها
الكل منهم فيه قسوه ولينا=وعلومهم يامساعد امشي باثرها
والحل عندي واحد من الثنينا=اما نهد الدار ولاَ نعمرها
بعني بسوق مخلصات السجينا=واشهد علي نجومها مع قمرها
والعالم اللي ما تبيك وتبينا=لوانت عاذرها فانا ما اعذرها
ومركوبة الشيطان والحاقدينا=لازم يعوَد كيدها في نحرها
وسو النفوس ليا ومرها القرينا=حصَادها ما عاد ينقى ثمرها
تبت يدين مبيحين الكنينا=وحيَك جنابٍ ذمها واحتقرها
واعتى الرياح ليا عنيت وعنينا=قامت نسايمها تلاطف بحرها
واختامها اقبل ما بطيبه بدينا=ازكى تحيات القلوب ودررها