. . . ( الرســـــــــــــايل ) . . . !!

مساءكم سكر :
.
.
للتواصل مع قلوبكم النقية . . قصيدة تم إكمال تصويرها في قناتي ( روتانا خليجية والدانه ) . . تمنياتي أن ترقى الى مستوى الذائقة العامة :
.
.
.

انا لو أطلـب رضـى الشهـرة وأدورهـا= إن كـان طاحـت بيوتـي قبـل ماابنيهـا
ماهيـب أغلـى طموحاتـي ولا أكبـرهـا= ولاهوب عيب ٍ علي إن قلت ( مابيها ) ..!!
يكفينـي هجـوس فكـري يـوم أصورهـا= وتمـر قلـب الهنـوف وتحتـفـل فيـهـا
كني بهـا يـوم تقـرا حـروف شاعرهـا= تموت .. والشـوق قبـل تمـوت يحييهـا
يوقـف الدمـع فـي روضـة محاجرهـا= ياليـن تسمـح لـه الـذكـرى وطاريـهـا
هي ( رحلة العمر ) ( ماضيها وحاضرها )= وهي ( طعم الاحلام ) ( حاضرها وماضيها)
مـن يـوم غابـت وتفكيـري يسامـرهـا=وتأخذنـي الـذاكـرة لأجـمـل لياليـهـا
أطهر ليالـي . . ولكـن كانـت أطهرهـا= الليلـه اللـي حكـت لـي عـن أمانيـهـا
وشلـون ليـل الحـزن يجـرح مشاعرهـا= وغيابـي إن غبـت لـو لحظـة يبكيـهـا
وقامـت تـردد علـى سمعـي خواطرهـا= وحكايـة أول لقـا بالصـيـف ترويـهـا
قالت تذكـرت ؟؟ قلـت شلـون ماأذكرهـا= لكنـي أخـاف .. مـدري لـو نسيتيـهـا
قالـت لـي مـن أول القصـة لاخـرهـا= أعيدهـا كــل ليـلـه قـبـل أخبيـهـا
لكن أبـي منـك ياروحـي و ( سكرهـا )= تكتب لـي آخـر قصيـدة لاجـل أغنيهـا
سجلـت أجمـل قصيـدة وسـط دفترهـا= وكتبـت إهـداء ( إنـي لـك ِ أهديـهـا )
قفلـت دفتـر غلاهـا قبـل ماأشكـرهـا= وقلت إن رحلت وطريـت فبالـك أقريهـا
قالت وغيبتك .. قلـي كيـف أنـا أقدرهـا= قلـت الرسـايـل إذا طـوَلـت ضميـهـا
وإن كـان جـاب الزمـان اللـي يبعثرهـا= حبيـب غـيـري . . أمـانـه لاتخليـهـا
ودعتهـا مـاقـدرت ألـمـح عبايـرهـا= أخاف من ( سكـرة المـوت ) وحراويهـا
ياشيـن الايـام لـو تـغـري مظاهـرهـا= هـذي بداياتهـا .. وش هــي تواليـهـا