ديوان الشاعر/ سعد المحمدي

*الشاعر الكبير الهاب الوسيدي*

*ياهيه قبل تمر الايام وتفوت*
*ونقول لدنيا سلام وداعي*

*باعطيك علمٍ له براهين وثبوت*
*نتايجه عن تجربه وطلاعي*

*انا الذي وسط البحر صارع الحوت*
*وطا برجله فوق روس الافاعي*

*احيان اخطط هجمة العب واشوت*
*واحيان اعود للوسط والدفاعي*

*وان كان ماني كل الاوقات مبخوت*
*عزمي قوي وفجوج ربي وساعي*

*مابعت شبر الوجه في لقمة القوت*
*ولاطعت راي المسكنه والرعاعي*

*واشوف لي روسن على متونها بشوت*
*تبني من الاوهام مجدن صناعي*

*واهل البيوت اللي قبل مالها بيوت*
*قامة تحط ابيوتها بالرفاعي*

*واليا اجتمع حاسد وحاقد وسربوت*
*وقامة ديوك الحي معها تعاعي*

*اصد شيمه وترك الهرج ويموت*
*وانا توردني على الماء ذراعي*
*****************************
*سعد المحمدي*

*ياحي هالصوره وياحي هالصوت*
*ياللي شعاني من معانيك شاعي*

*حركت ماب القلب في زر ريموت*
*وصبح علي الصبح يالهاب واعي*

*وانا من اول دافنه وسط تابوت*
*يكفي من الحزبين زايد صداعي*

*من ناس تلبس فوق بشت الوبر كوت*
*عن صاعهم يفرق بالازمات صاعي*

*كنك تدير بداخلي عين جالوت*
*مدري تسويلي تنفس صناعي*

*ان قلت بعد عقاب ماحد عشق نوت*
*زاد الكلام اللي على غير داعي*

*وانا مراهن لي على حوار مكفوت*
*لراس باس ولسفينه شراعي*

*بعدك عن الكوفه يادكتور بيروت*
*بالذبذبه سبب خلل ونقطاعي*

*تبغى الكلام اللي مثل صافي التوت*
*ماروجه من شيت البدو راعي*

*تبقى لصعبات المواضيع منعوت*
*الياعون فوق الطويل السباعي*