اسمعوا مااقلت وانت لاتقلي

اسمعوا مااقلت وانت لاتقلي = ماالخبر وانا مفسر لك كلامي
العطا مبذول والمفروش زلي = معدني من عهد مرحوم العظامي
قول حياالله من في الدار حلي = عادتي وافخر بها طول الدوامي
كل ماجونا عرب قمنا نهلي = سلموا واللا مانادوا بالسلامي
ديدني والمنتدى الحربي محلي= مرحبا في مرحبا خذها شمامي
قلتها من غير خوف وغير ذلي =من تواضع واعتلا منها مقامي
والمثل قال المهلي مايولي =مرحبا مبدا الكرم عند الكرامي
جيت مع ربعِ وحاسبهم هلِ لي= كيف لا والغانمين ابنا العمامي
لابة من قربهم مااحد يملي = ياسقا الله وانت واياهم ليامي
حبهم كل المعاليق استحلي = حبِ انقى من هماليل الغمامي
وانتبادل كل علمِ مستقلي= لاعطيته علم جا علمه قوامي
والنصايح كل ساعة تستهلي =واللغو مايدخل اعلوم الحشامي
وكان تاه الفكر يلقى من يدلي= ياخذه للنور ويزيل الضلامي
عشرة الاجواد فيها كل حلي= من مشاربهم روي من كان ضامي
عشرة منها ندل ونستدلي = والله انك وانت معهم ماتضامي
والشعر لصار له مغزى يسلي= خص لكان الهدف منه احترامي
وللرسول المصطفى سلم وصلي= ياصلاة الله على خير الانامي