الى قطر.....نايف بن مياس

موجهه الى الشاعر ابراهيم النجيدي من قطر

.

.

لادندن الهاجوس والبال مرتاح=مثله معي يوم الضماير جريحه
مايختلف وقت التعاسه والافراح=من وين مالديت نفس القريحه
يشوش بي مع طاري الرمش ذباح=الفاتنه والناعسه والمليحه
واعزف لحون كنها الورق لاناح=لاميل الاغصان نسناس ريحه
وان كانها بمناطح الجوخ وسلاح=وجه المعادي تكتسيه الفضيحه
لاصاح في عال المراقيب صياح=سليت سيف ضايق في ضريحه
وان عودت لاهل المكارم والامداح=اهل الفعول الواضحات الصريحه
ياما حلا قدام طلات الاصباح=مع عودة انفوس العباد الطريحه
فوق الذي كنه على خف وجناح=فكسار به من سوبر ستار ليحه
اليا هوى مثل اشهب النجم لاطاح=وان راغ روغة ذيب قافيه صيحه
اليا تحرك من شمالي الاسياح=يطوي جراديب السهال الفسيحه
نقصر طويله بالسواليف وامزاح=ناصل قطر وانفوسنا مستريحه
منصاه بيت للمواجيب نطاح=تبطي ضروف التعريه ماتزيحه
هذاك ضاوي له وهذاك سراح=مدهال طلقين الوجيه الفليحه
يدلنا للبيت بنه ليا فاح=وصحون من عقب الذبيحه ذبيحه
ماهو محسب للخساير والارباح=مايذبح المترديه والنطيحه
نتايج التاريخ من جهد وكفاح=من لايح التاريخ محدن يميحه
بيت عليه من الكرم درع ووشاح=مثل العلم راعيه هباب ريحه
سلام مني عد مابارق لاح=طعم الشهد ومن البساتين ريحه
تنصى ابراهيم النجيدي بالالواح=الشاهد الله والنوايا صحيحه
خابرك يا ابراهيم فاهم ولماح=فيك الثقه والمعرفه والنصيحه
واستاذ في علم المعاني ونقاح=تصوغ جزلات البيوت الفصيحه
تمشي على درب التسامح والاصلاح=ماتسرجون الخيل مع كل ضيحه
والخير له مفتاح والشر مفتاح=والدين قدر الناس مايستبيحه
يعرف قدر هداج من ذاق الاملاح=لاشاف بيره مايروي نضيحه
وان كان تو مقيط برشاه لو لاح=ان طاح والله ماحسبنا مطيحه
مطلوب خير ولانقفيه باطماح=وحقوقنا من زل فيها نبيحه
هو جاس لو راعيه ماجا ولاراح=ينوب عني هاتفي والشريحه

.

.

نايف بن شليويح بن مياس الفريدي