جملة الخلان

يقولون كلٍ لاتعاقب زمان يتوب=وانا اقول ان اهل الهوى مالهم توبه
ولوكان راجح عقل وفي لابته محسوب=اذا مسه اللي مسهم صار لعبوبه
من الحب واللوعه على الارض يمشي ثوب=صروف الهوى خلته مايحرز دروبه
وانا كنت احسب اني بصوبٍ وهم بصوب=وكنت اتشمتهم واثاري لهم حوبه
غبي مادريت ان للهوى دوره ودالوب=غبي احسب ان الحب بس في هكا النوبه
ليا جنّ ليلي ويلي من طاري المحبوب=وعزي لمن مثلي جنى ظلم محبوبه
اغني على المنكوس ونوبٍ على المسحوب=وليل المعنى يصرمه كثرة طروبه
وهذي نتايجها سهر مع هجوسٍ عوب=هجوسٍ من اتلوبه تقلب على اجنوبه
الاواعذاب القلب لاعرضّ الرعبوب=تقول القديميه على القلب مسحوبه
الا ليت ماشمتّ في حابب ومحبوب=الا ليت شمتي باللي مقصّرن ثوبه
تقيّن يبي وقت السهر يطلب المطلوب=مولّم لها سجده مع دموع مسكوبه
مصلّب على القتات وشذابة العرقوب=على العالم اللي تالي الوقت مسبوبه
مهو بمثلي في شبابي عنى وتعوب=ربيع الهوى قد غرني فزة اعشوبه
ولكن عسى ربي يصلي علي ويتوب=وعن جملة الخلان يقبل لي التوبه