معجزات حرب

هذي القصيدة ألقيتها في حفل قبيلة حرب الذي اقامه الشيخ عطالله خويتم الجابري والشيخ عواض صعيب الجابري بالمدينه المنوره في تاريخ 2/4/1433

يالله يارب البسيطه رحمتك يوم السؤال=نسألك يارب الثبات ورحمتك نلجابها.
يالله عفوك نرتجيك ونطلبك حسن المآل=ياعالمن غيب الصدور وماتكن ادرابها.
يامحصي ذنوب البشر رحمتك يارب الجلال=عبدك ضعيف ويطلبك يوم النفوس احسابها.
يالله تجملني على الوقفه ليا جالي مجال=نبدا بذكرك يوم ذكرك خير مايبدابها.
الشعر ميراث العرب ديوان لسنينن طوال=تناقلوه اجيالنا بصدورها وكتابها.
بحضوركم جزل الفرايد والمقام وله مقال=اصوغ فيها المفرده وشدها بطنابها.
فز الهجوس وهاجسي خابره لامن قال قال=جاب البيوت الطيبه ويتلها بارقابها.
يختار فيها ويتخير مايجيب الا الجزال=ماني سوات اللي يشابه بالحضور غيابها.
ياهاجسي هات الجديد وفيك تحقيق الامال=بين الرجال اللي على الجزله تحث اركابها.
يامرحبا ترحيبتن بعداد همال الخيال=واعداد مانظم من ابيوت الشعر كتابها.
واعداد من باع وشرى بالسوق بجنيه وريال=ترحيبتن ماينقفل طول الليالي بابها.
اطيب من الفنجال الاشقر من مباهير الدلال=واصفى والذ من القراح بوصفها يروابها.
العود الازرق فاح طيبه للنشاما بالقبال=والشاذليه ماتساق الا على شرابها.
في ليلتن نفخربها ونعدها باحلى الليال=النفس تغمرها السعاده في حضور احبابها.
بحضوركم تشريف لنا يابعيدين المنال=الله يحييكم ونفرح فرحتن نزهابها.
الضيف مقداره بدعوه تاصله ولا اتصال=ومقدارنا في جيته من دعوتن لاجابها.
الطيب منهج والوفاء في وقتنا بين الرجال=الله يبارك بالرجال اللي تزور اصحابها.
في حفل ربعي حرب مالي عذر بالدعوه يقال=لوغبت قالوا غاب محدن يلتفت بسبابها.
لوقلت لي معذور انا مالي عذر يابوطلال=هذولا ربعي حرب عز الراس لي واقوابها.
ربعي هل العليا ليا جات المواقيف الثقال=لاجاء نهارن يعتزي فوق الفرس ركابها.
ربعي حزامي واتنومس في كريمين السبال=ستر الهنوف اللي على يدها تحط اخضابها.
لا عدوا ارجال الوفاء والطيب وافين الخصال=حرب الحرابه واللقب معروف من القابها.
الاسم حرب وحط لك قوسين واسمع مايقال=ثلاثة حروف وثلاث المعجزات اعرابها.
الاوله اهل الكرم حقيقتن ماهي خيال=حجرف وابن ناحل لهم فعايلن يحكابها.
والثانية قصة نويشي جات مضرب للمثال=دون الدخيل اربع مع الاثنين يمنى صابها.
وثلاثه ادخيل البلالي فك ابن جاره وحال=ارخص بروحه ماحسب للمقبلات احسابها.
هذا وفاء حرب الحرابه والحقيقه ماتزال=هذي نوادر من مواقف غيرها يدرابها.
من غير قاصر بالقبايل من جنوب ومن شمال=الطيبه من حظ رجلن في زمانه جابها.
وختامها صلوا على المختار بختام المقال=على الرسول الهاشمي اخير ماينهابها.