ديوان الشاعر/ سعد المحمدي

الشاعرحفيد الحجيري

راكب اللي دقّ سلفه تنقفل بيبانه=والمرايا دون لمس تميل يمّ عيونه
يصيد ساهر قبل لا ساهر تلدّ اعيانه=وجهته يم الشمال ، الشام لا من دونه
وجهته دارن صدور رجالها مليانه=بالوفاء والطيب والمقصود ما تخفونه
يا سعد سلام لولوّه مع مرجانه=بالوفا غيثه يهل وبارقه في مزونه
من هجوس الشاعر اللي لا بدع قيفانه=ما يجيب الا البيوت الحره الموزونه
ما يدرعمها كذا يا ليل دانه دانه=ولا يسندّها سوى شاعر كماك لحونه
شاعرن مثلك بِناه تقوّمه سيسانه=والجزيله منه دوم أعدّها مضمونه
لا قلطت بساحة الميدان قالوا عانه=ولا زهمتونا وجينا الصف ما تحصونه
من جماهيرن لشعّار الجزل طربانه=ملتّ اللي لو يسدّون أذنهم يوحونه
ملّت اللي إنْ قال خلوووووها فزع جيرانه=يشغب شْغاب العجوز الكهله الملعونه
وإن بدا قافه يدفّ المكرفون لسانه=من حماسه يمكن انّه يِنْشِبه في سنونه
المعاني مالها فالشعر عنده خانه=ولا نصتْهْ أهل المعاني ينحني عرجونه
يا سعد عزيّ لحال الشعر تال أزمانه=اختلط لاشه بكاشه وانكسر عربونه
بومته تال الزمان مداحمه شيهانِه=عالته صاروا لك الله قادته وحصونه
الله أكبر كيف راسه حطّ مع كرعانه=في زمن عنوانه أبداً ما عكس مضمونه
يا سعد والبارحه والدار أجول أركانه=شفت من هالعينّه واحد كذا بكرتونه
يشتري و يبيع مع نفسه وسط دكانه=المحل اِهوَ مديره ، بايعه و(اِ)زبونه
يصنع الهجمه ، يغيّر رقمه وألوانه=ويركض يسجل هدف ، ويقول ما تصدّونه
طير بس أزرت تحلقّ فالسما جنحانه=كل ما جا يستردّ الثار زاد طعونه
يوم جردّناه من سيفه وسرج حصانه=قام ياطا فوق ظلّ اللي كسرله نونه
واعناه اللي رفَع عينه على عمّانه=واعناه اللي يداحم ضلعنا بمتونه
كم فتى قبله خسر قدم الرجال رْهانه=ما نجا إلا لحيته فيدينهم مرهونه
وكم فتى قدامنا تقصر طويل أيمانه=العزيز (اِ)له المعزه والذليل مْهونه
يا سعد فختام قولي يا سعد سبحانه=خالق عباده مدبرّ كل شي بكونه
ما نبا إلاّ رحمته ، عفوه وروض جنانه=نرتجيه وكل خلقه ياجودي يرجونه
والصلاه اِعداد طيرن طار فوق أغصانه=فوق من يشفعلنا في يوم ما تدرونه

ردي على الشاعر حفيد الحجيري

مرحبا ترحيبةٍ مثل الذهب والدانه=بالوفى والطيب لأهل الطيبه مشحونه
بالمعاني توجة ماصدرة عريانه=يوم بعض الناس فهمه بالقصيد أيخونه
في كلام الشاعر اللي مانقلل شانه=جاتني من فوق موتر ماعرفنا لونه
من بلاد الغرب مدري صانعه يابانه=الله أعلم ماقريت ارقام في طبلونه
الوكاد انه جديد وشركته فنانه=عالميه ماكتبوها شركةٍ مديونه
ياحفيد الوقت هذا ثايرٍ بركانه=فيه يبلش صاحي العربان في مجنونه
لو تشوف أهل الغنم بقدامها الحفيانه= سيدين الناس ثوبك لاتعقد اردونه
قبل قلبك يالحجيري ينفجر شريانه= الغطاء ياصاحبي خله على ماعونه
البلد حاول تجنب شرذمة سكانه=الحبل لاتهمله لكن لاتشدونه
الشوارع بالبلد تبغى نظر وصيانه= قبل بيت العز تهدم ياحفيد اركونه
علم الراس الكبير وشد معي أبطانه= قبل سكان البلد تعصى على قانونه