وداعية وترحيبية

طلب مني شخص عزيز أن أنظم كلمات على لسانه وداعية بشخص يعز عليه....وبعد فترة أعاد على صاحبي نفس الطلب ولكن ترحيبيه بالشخص الذى عاد من سفره....صاحبنا يعز علينا لذا تقمصنا شخصيته ونطقنا نيابة عنه وإليكم الوداعيه والترحيبيه...ولكم مني أطيب تحيه

الوداعية

يامل قلب(ن) كل هم(ن) يتله= قام يتصفق بين حدب الضلوعي
قلبي تزلزل من ضلوعي محله= تسارعت من فوق خدي دموعي
ياقلب صوت للمسافر وقله= قلبى على فرقاه دايم جزوعي
الصاحب اللي مالك القلب كله= متى على الله ناوين بالرجوعي
الله يجيبك يا رفيع الجبله= أنت المميز بين كل الجموعي
أرجع علينا خلي البعد خله = عندى خبر مافيك عرق(ن) قطوعي

الترحيبية

يا مرحبا ماتطلع الشمس وتغيب= يامرحبا باللي لفا من غيابه
أهلا هلا ماقالوا الناس ترحيب= مرحب هلابك عد وبل السحابه
يامرحبا يامنبع الخير والطيب= أهلا هلابك والمسافر هلابه
يامرحبا ماقيل قول(ن) بترتيب= وإعداد ماخطوا حروف الكتابه
احلى سلامن يامنزه عن العيب= لكم غلا بالقلب ماله تشابه
الصاحب اللي مايبيله مناديب= غالى وغيره ماحسبنا حسابه