بعض أصناف الرجال

زارني صديق عزيز وعرض علي أبيات له قليلة ولاكنها كثيره بمعناها ومغزاها ولقد جاريتها بحيث إنني لاحظت أنه حكر أمور الطيب بثلاث مواضع والطيب له بحور وموارد ومناهل عديده كما للردئ مثل ذالك ولعلى ذكرت بعض المواضع من باب الذكر لا الحصر فارجو أن يعجبكم مانقدم لكم.....

أبيات صاحبي

أحدن رفع بالاسم وأحدن يوطيه=وكل(ن) جنى حصيل فعله بيمناه
أما كرم والأ شجاعه تباريه=أن غر منهن ذاك خله بعمياه
ومن قبل ذاك دين ربه يواليه=ومن ضاع دينه ضاع حتى بدنياه

مجاراتي للأبيات السابقه

حي الكلام اللي جزيله معانيه=من شاعر(ن) زين بيوته ومعناه
يقطف زهر مالاق حكمه وتنويه=من جوهر الحكمه للناس مهداه
بغيت أحاول بالمعاني أجاريه=وجهة نظر كل سيل(ن) بمجراه
رجل(ن) تعلى بالمعالي مباديه=اللي زرع الطيب ياطيب مجناه
رجل(ن) ليا حاولت بالحال تفديه=وش حيلتك لاضاع دينه ومبداه
ورجل(ن) تعزه من معزة أهاليه=ورجل(ن) لفا بالعز لو مالهم جاه
ورجل(ن)حكيم ترسله دون توجيه=عقله دليله صاحب العقل كفاه
ورجل(ن) ولو تعبت نفسك توصيه=تايه دليل وضايع(ن) دوم ممشاه
ورجل(ن) تهزه كل نسمه وتذيه=ورجل(ن) كما ضلع(ن)شامخ بمرقاه
ورجل(ن) تلزه بالاشاره وتكفيه=ورجل(ن) تعرقى فوق رأسه ولا أكفاه
ورجل(ن) ضعيف يستفزه بناخيه=ورجل(ن) شديد عاشت الناس بحماه
ورجل(ن) ترزه بالمجالس حكاويه=ورجل(ن) فعول الطيب بأسمه مسماه
ورجل(ن) كريم منصى ربعه وعانيه=والناس تسعى له وتمشى على خطاه
ورجل(ن) على بيته ماحد(ن) بناصيه=لا سر غيره ولا أحد(ن) عايش برجواه
ورجل(ن) على ذكراه العين تبكيه=ورجل(ن) على موته ماأحد(ن) بينعاه
يا صاحبي القلب كافيه مافيه=الله يعين اللي نقل داه برداه
الله من قلب(ن) همومه توديه =لشىء(ن) من الذكرى لا حل طرياه
تم الجواب وباقى الهرج نخفيه=والعلم شاره مدور العلم يلقاه