ديوان الشاعر(بخيتان البشري)

بخيتان =
ياعزوتي يامنيع وسد = ياللي لكم فالوفا تيجان
سلام كثر النجم وازود =وما فالوسيعة عدد سكان
علي عيد=
للسد يامعتزي مسند = لرجال شرواك يابخيتان
ترحيب ماينحصي له عد = واعداد مازخه الهتان
بخيتان =
راعي وفا ياجزيل المد = يامن على النايفات يبان
جرحي وصل عمق ما له حد=واستئسر القلب والوجدان
علي عيد=
حيرتني ياعريب الجد =واصبحت من حالكم قلقان
انا على ماقفي ماصد =آقف معك ماقف الأخوان
بخيتان=
يوم يتجدد ويوم يجد = يجري مع الدم فالشريان
جديد توه حديث العهد=ماكنت شاقي قبل ما كان
علي عيد=
اسرعتبي مير بيه هد =حتى نركز معك بإتقان
والآن فصل لنا المشهد =وأنا لكم مصغي الآذان
بخيتان=
من ود اشقى فؤاد مود = اصبحت من ودهم شقيان
قربه كما خاتمي باليد =وابعد من النجم للأعيان
علي عيد=
يامن توجد لولفه وجد = واصبح عليهم لهم ولهان
إن كان في قربكم يسعد = البعد يجتث للخلان
بخيتان=
أنا على بُعدهم منحد = وقُربي لهم يجلي الأحزان
طرفه بنا الليل مايرقد = وليلي معه بالفكر سهران
علي عيد=
إن كان تبغى الكلام الجد =سيطرعلى الوضع ياربان
لابد في ذا الأمر تصمد = مادام خِلك لكم هيمان
بخيتان=
صادق فماقلت يامنشد = ولازال صبري معي برهان
لكن في دربي المنسد = ليا متى تصمد الأشجان
علي عيد=
اسعى في دربه وزيد الجهد = مادام قلبك لهم رغبان
خلك لكل العوايق ند=وتحقق الحلم مهما كان
بخيتان=
لازال جسر الوصل مانهد = قايم وله في لقانا شان
غالي ولاينشري بالنقد = هو غايتي فالحياة وكان
علي عيد=
نفذ معي كل ما اقصد = من يستمع شورنا كسبان
بافصّل العلم واجسد = لأنسان هايم فود إنسان
خلك قوي العزم لا تضد = الصبر والرفق والسلوان
ثلاث فالود مثل الحد = وتعيش باقي العمر فرحان