ديوان الشاعر سالم البشري

((( زهورات )))=
********* 1 *********=
تبسّم الحرف بوجودك=وصوّر جميع المشاعر فيك
وابحر هوى قاصد حدودك=كل مااقرب يبتعد شاطيك
********* 2 *********=
لو يعلم الود بالخافي=وانه سكن في حنايا الروح
ماكان يرضى بإجحافي=ويسيبني للعنا مجروح
********* 3 *********=
ماعاد قلبي يبا تبرير=والروح ملّت متاعبها
الكل منهم يبا تسعير=لاوين اسدد واقاربها
********* 4 *********=
أستعذب الشوق واعزّه=لاصار يمّك يوديني
أدراه مااعضاه والزّه=حتى معك مايعنّيني
********* 5 *********=
على جدار الزمن خطيت=اسمي واسمك عشان تحس
لكن عيّت معي ياليت=تنبت ويثمر هذاك الغرس
********* 6 *********=
عصف بي الشوق واستحكم=على الحشا وشب لي ناره
واللي فؤادي معه قدّم=باسلوب لومه ومعذاره
********* 7 *********=
بالأمس طاير بنا مدّاح=ترسم حروفك مآثرنا
واليوم صاير سهم ذبّاح=طعناته ادمت مشاعرنا
********* 8 *********=
صعب اوصف الشوق والحيره=وصراع الافكار فـي ذاتـي
غيـر انـّي اقـول ماغيـره=يقـدر يخـفـف معانـاتـي
********* 9 *********=
لاياهوى وين عني رحت=أشعلت في قلبي الصالي
ورغم الألم داخله مابحت=حتى أصبح الكل يرثالي
********* 10 *********=
نفحة أمل تلثم أرجائي=أحيت وله فالحشا ساكن
والخوف ادوّر دوى دائي=والقى جواب الصبر لاكن
********* 11 *********=
لاياهوى خافقه مجروح=من يوم ودّه رحل واقفى
أقفى وعقّب بقايا روح=ماظنّها بروحته تشفى
********* 12 *********=
لو يعرف الود مايقسى=ولاّيتجاهل وفانا أمس
لكن بقلّه قبل ماانسى=الود ماهو كلام وبس
********* 13 *********=
ودي أخفف من آلامه=والله ودي ولادري كيف
وماودّي أظهر فأيامه=واروح كني سحابة صيف
********* 14 *********=
ياروحي الشّوق يأمرني=ولواعج الود فضّاحه
ياليت يقدر يخبّرني=ويخلّي الرّوح مرتاحه
********* 15 ********=
سيّبتني يالغلا مشغول=افكاري تجيب وتودّي
واخاف تخرج عن المعقول=قدّام لا اروق واهدّي
********* 16 *********=
ياشوق عذبتني ياشوق=كل قلب نفسه فمحبوبه
وانا لعلمك حبيبي ذوق=زي العسل كله عذوبه
********* 17 *********=
ماقلت قلبه كذا قاسي=يقوى على الصد والهجران
والله لو قدّر احساسي=ماكان يرضى عليه يهان
********* 18 *********=
مالوم قلبك على مافيه=ولالوم قلبي على حبك
هذا الذي كنت متمنيه=أكون ساكن وسط قلبك
********* 19 *********=
اللي جعل حيرتي تمتد=قصّر وطّول مسافاتي
كل مابقلبي قرب أبعد=وجدد عليّـه معاناتـي
********* 20 **********=
كيف اكسر الحاجز النفسـي=من وسط قلبه وازيل الخوف
حتى الأثر مايجي عكسـي=على الذي مسكنه بالجـوف
********* 21 *********=
أحس بشعور ماله وصف=يضفي مع الشوق واللهفة
في يوم كفي يلامس كف=واسمع نغم حب من عزفه
********* 22 *********=
ماباخذ العلم أخذ الجد=لوكان مضمونها صوبي
ولاابيع روحي وذاك الود=لوكان تاهت بي دروبي
********* 23 **********=
في كل الايام لك ترحيب=في داخل الروح متواجد
وفوقه موده معزه طيب=و الله رب الملا شاهد