ديوان الشاعر / علي بن زيد الحربي

وصلتني رساله من الشاعر / مرزوق مبشر الحثل هذا نصها :.
الاخ العزيز علي بن زيد الحربي سلمه الله
تحية العروبة والاسلام الخالده :وبعد
ابعث اليك هذه الابيات المتواضعه والتي تتخذ الغموض بعض ابياتها
ولما اعرفه عنك من صواب الراي ودقة التحليل اخترتك منصا لها وهي:.

من السليل بعثنا الجمس بزروفه = للخرج واللي سكن بالخرج من غادي
ومن خوف لايشتبه معناي بحروفه = علي ولد زيد فيه المدح ينقادي
اللي يكثر من الترحيب بضيوفه = ماهو تصنع طبيعه بابن الاجوادي
نفسه على منطق الترحيب معسوفه = مع ما تيسر تحس بلذة الزادي
اليا مدحته بفعله مالي حسوفه = اديت واجب ومدحي له ما هوعادي
اديت واجب وخصمه يضرب الطوفه = ان ضايقه ريحة الريحان والكادي
ان باع والاشرى مع تاجر الكوفه = من ساس غادي ومن جامل معه غادي
ياعلي بن زيد جتك ابيوت ملفوفه = مضمونها ترجمة صلبوخ وازنادي
ارسالتي ياوسيع العرف مسقوفه = على سوألين مع دله وبرادي
اباسألك عن اعلوم غير مكشوفه = تحت الثرى بالعفار وجاوب البادي
كان الاجابه على الوجهين معروفه = ركّز على مغناطيس السيف جلاّدي
ون كان ناظورك الفضي قصر شوفه = لايميز الخط الاصفر عبر الارصادي
اباآصفه صورة التوضيح ماصوفه = من ضمن الاحيا ولكن روحها جمادي
اللي شرب من معين العمق بكفوفه = باية طريقه يعاتب ريس النادي
بمبارز السيف فاز وغمّد اسيوفه = واللي ورا السور هيس عند جلاّدي
ومن كانت اذنه ربيبة كل معزوفه = احيان يطلع من الملع للالحادي
واللي بجوفه يباهي بكلشنكوفه = على قمر سم دمه شغل الرادي
مده وجزره تكهرب في بحر جوفه = يتبع مصدر وينظر صوب ورّادي
يتبع هوا الفاطر اللي نوب مردوفه = مع نافخ الكير لوماهو بحدادي
الواو معطوف ضمن حروف معطوفه = ياللي سبح في محيط وغبة الهادي
اما النقط من حروف الجر محذوفه = يامورخ العلم في هجري وميلادي

فرديت على / ابوهلال التالي:.

الجمس عبر الفيافي جاب مضروفه = يامرحبا به عدد ماسال من وادي
ابيات شعر بفن وذوق مرصوفه = فيها معاني وفيها سيوف حدادي
كأنها من زهور الورد مقطوفه = اعتز وافخر بها في روس الاشهادي
ماهي لمن حاول التحليل مكشوفه = اللي بناساسها في بنيها استادي
عن كل عين تثير الشك ملقوفه = ابعد مراميه عن عايد وعوادي
كلمة وفا من وفا بالقلب مالوفه = علم قديم ومعه علوم جدادي
لكن عسى مجاوبه تسعى له ضروفه = ويصير حول الهدف يالله ياهادي
يابن مبشر ترى الاوضاع محفوفه = بملابسات لها تاويل وبعادي
ياللي طمست الهدف وشلون ابا اشوفه= وانته دفنت الهدف باعماق الالحادي
والرجل مايدحم الجدران بكتوفه = ويحاول انه يقدم رايه القادي
اللي شرب من معين الخوف من خوفه= من يطلبه قصد ياخذعشرة افصادي
واللي وطا فوق جمر النار بخفوفه = مما يعانيه يندب حظه الرادي
مبداه بنهايته والعلم برفوفه = والظفر ابو زيد بالغفلات ينصادي
وان كان حمل الجمل حول على اردوفه = مالي وماله مادام اني على شدادي
والمحترم لحيته بيديه منتوفه = ليا صار يشره على متعب وشدادي
نفسي عن اللي يغث النفس مصروفه = لاتلومني ياسديد الراي بعنادي
النفس ماهي على من صد ملهوفه = ولاني على متابع المقفين منقادي
من دخل يديه وصط الجحر ولجوفه = ماجاه حقه وراع القيد ينقادي
وقت الرخا مايبين الرجل ووقوفه = متشابه موقف الممتاز والعادي
لكن محك الرجال الوقت وصدوفه = اللي به الحر دون الواجب يفادي
واللي تبع فاطره سنه شبك صوفه = يسعى ورا الزود مار النقص به زادي
يمشي بواد عميق تتعب اجروف = وان ضاع ماله من الاجواد نشادي
الاذن تسمع لكن القلب له شوفه = احلل اللي سمعته واتبع مرادي
والرجل عن مايعيب الرجل مكفوفه = وان زلت الرجل عذري ماهو عمادي
جتك الاجابه على قسمين منصوفه = من عقب ماطال محداري ومسنادي