ديوان الشاعر ( راشد الزهراني ) المحيط

البدع ناصر الحجوري=
خليك شاهد على الاحباب = واللي جرى من حبايبنا
فيهم ياراشد تعبت عتاب = وانته صاحبهم وصاحبنا
الرد من راشد الزهراني ((المحيط))=
لابأس يا مشتكي من باب = مثلك لنا ازمان متعبنا
يفتح علينا بدون اسباب = ولا ذنب لأجله يحاسبنا
الحجوري=
هم يحسبون الجبل طبطاب = يمشونه سهول لا غبنا
مايحسبون الجبل مرقاب = اعلى هاماته مراقبنا
راشد ((المحيط))=
وقفت بذهول واستغراب = من طبع ماهو مناسبنا
ولا تكون النفوس اطياب = ولا يوافق مذاهبنا
الحجوري=
وجه عليهم عتب جذاب = لصحو الضمائر يقربنا
عسى الضمائر تعيد حساب = وتصحى وتنهي متاعبنا
راشد ((المحيط))=
صدق الضمائر من الآداب = ونحبها من تأدبنا
وعزي لمنهو ضميره غاب = بيته على ساس مايبنا
خلك معه مثل رمح ذياب = مابه مكاسب تكسبنا
مادام ضنك بضنه خاب = واجبك تركه وواجبنا