لا قدحت النار والبن يحمس = وقروم ربعي كلهم بانتظاره

(طرات الروح)

لاقدحت النار والبن يحمّس=وقروم ربعي كلهم بانتظاره
مع دلتينٍ فيهن البن ماهس=القطفه الاولى نقاوة بهاره
وكبشٍ هل الناموس فوقه تنومس=كلٍ يبي مثله لياجا نهاره
وسوالفٍ لين السويبع تنكس=ومن له شوير بكلمته ماستشاره
ودارت سوالفهم على طيب الانفس=كلٍ سرى مبسوط واخذ قراره
هذي طرات الروح قدام تيبس=قبل الحصاد وقبل وقت انكساره
يوم الردي عن واجب الظيف يندس=وان خلفو يسرع للحس السواره
وان شاهد الخطار من مجلسه نس=وراح يتمشى في نحر بيت جاره
حتى يحول نظرهم ويتلسلس=حصني ودمه وصفته دم فاره
وجداه ليت الطيب ملبوس يلبس=حتى نعرف النذل من دون اشاره
مثل الفهد والنمر والذيب والبس=ويصير للأنسان نفس العباره
مااقول انا لطيب رجلٍ مهندس=قسمي مع اهل الطيب مثل الشراره
اعوم في بحر المثل ماتطفس=أرشد بها نفسي ومن له انظاره
ياخالد ابوصيك وابغاك تحتس=ترى النذاله عيب ماهي شطاره
لاتجالس الانذال باالهرج تفرس=ترى ضعاف الهرج منه المراره
ناظر شرار النار وشلون يقبس=اكبر حريقه من ضعيف شراره
لو ثوبك ابيض مجلس النذل يدنس=ون ردت الاخبار قالو خساره
جالس ثلاثه رجال ماقول لك بس=يمكن وراهم مثلهم فالاداره
الاول الي لو هبا الدهر ماهس=معشي الخطار لو بالاعاره
صينيته دايم من الحيل تدمس=وكم مرةٍ تغصب بشط الحواره
مع دلتينٍ نارهم دوم تقبّس=ومن تاه تال اليل شاهد شعاره
والثاني الي لشجاعه مدرّس=لجا نهار مولع ابليس ناره
كفه يدوس الي له ابليس وسوس=يرخص بروحه دون ربعه وداره
اسبابها الهزلا الوجيه المنحس=وعود شقاها للفهد والنماره
والثالث الي للخطا مايترمس=عقله كبير وهرجته باختصاره
له كلمةٍ تطلق جميع المحبس= وان عمست الاريا عود لشاره
ولاتابع الدنيا تشيب وتعمس=حاول تسير كل وقت بمساره
دنياك هذي من تبع رايها افلس=بالفكر ولا في مجال التجاره