ياريم مجدول الشعر تنقضينه

السلام عليكم ورحمة الله وبركاته
؛؛اهدي لكم هذه الابيات


ياريــــم مـجــدول الشــعـر تــنقـــضــينـه
ومـــــعطر(ن) بالـورد زيـــن البــــلالـه

يامــن كــــما البـراق موضـــي جبـــينـه
ياعين شيهان(ن) على الكــــف شالـه

بدر الحـــــويـفي يـوم وقـــتـه وحـــينـه
لا اشــــتاق يـــبدا كل رجـــم(ن) زمالـه

لاتجــــرحــــيـن القـلـب لاتــــجرحــيـنـه
يكـــــفيه مـــن جــرح الزمـن ماجرالـه

هـــــم(ن) تـوطـى ظـــامـره والغبـــينـه
مــــن ناس شــي(ن) ماتــصـور ابالـه

قســوة اظــــروفه بيـــحـت فـي كنـينـه
واصــــبح يصــفـّق في يمـينـه شمالـه

قلب(ن) على الماضي كـثير(ن) حنينه
عليـه يزعــــــج ونــتـه مـــن هـــبالـه

الله ياوقــــت(ن) تقــــــافـت ســـنــيـنـه
يـوم الزمان الزيـن والــقــــلـب دالـه

يــــوم النـــوايـا الطيــبـه والثمــــيـنـه
والجـــــــار طيـّـــب طيـــّب الله فـــالـه

يوم القــلوب نظــاف والنـــاس زينـه
والجــــو صـــافـي مـا تغبّـر ســهالـه

يـوم السحـاب بنشـــوتـه خــــــابرينـه
باول قــــدوم الوســـم يزبــر خـــيالـه

والضـــلع وقــته يـوم تاشـع بطـينـه
ماكــنـه الا مــن ضــواحـي صــلالـه

ريـــم الــفـلا حولـه تـــحفـه سكـينـه
ولا شـــاف قـناص(ن) يـزود جفالـه

واليوم والله من شـقث فيـه عـــينـه
لـو عـــس يــــمـه مايـدوج حـــلالـه

دور(ن) تــغيـّر يالقـــلـوب الفطينـه
وراع الجـمالـه مبــتلـش بالجمالـه

ومن عاش دور العولمـه والمدينـه
مايـــخدمـه ياكـود عــــملـة ريـالـه

ومــن لا يـودك حـط بيــنـك وبــينـه
الفــين كيـــلـو ليـن تنسـى مجالـه

والرزق عند اللي ومـر بالسفينـه
سبــــحانـه المعبـود جـــل جـلالـه



التوقيع/ مساعد الجليدي

صح لسانك مليون على القصيده
والله يـعـطـيـك الـعـافيـــــــــــة

بيض الله وجهك

صح الله لسانك
ولاهنت
وسلم فكرك وبنانك
دمت برعاية الله وحفظة

السلام عليكم ورحمة الله وبركاته
سلمت ودمت أخوي الشاعر ‏مساعد الجليدي على القصيدة .
.
.
جزله ورائعه وصح لسانك
أخوك ابوساره

الف الف شكر لكم جميعاً على مروركم وعجابكم
بهذه الابيات المتواضعه وهذا شرف لي
ووسامٍ على صدري دمتم بخير وعافيه

لاهنت وصح السانك

تقبل التقدير والاحترام

وفقك الله

صح لسانك


وبيض الله وجهك على القصيدة الرائعة


دمت مبدعاً ومتألقاً

صح لسانك
..
..
أسجل اعجابي بالقصيدة
..
ويعطيك العافيه
..

	المشاركة الأصلية كتبت بواسطة الجرح

	لاهنت وصح السانك تقبل التقدير والاحترام وفقك الله

الف شكر لك على مرور
الجميل
دمت بخير وعافيه