ديوان الشاعر الكبير/ عيسى بن رشيد العويمر (رحمه الله)

جانا الشتا وجاز التصلي على النار=وراع الولع زاد اهتمامه بطيره
زاد اهتمامه بالوحش كل صقار=متنطح(ن) عامه بشره وخيره
مهتم بطيره همة الوالد البار=بالخص كان الطير يبهج ضميره
لاصار طيره يضرب الجول بحصار=مع ناظره يرسل لطلعة خفيره
يرسل خفير(ن) يلحق الجول طيار=نادر حرار الموت لامسا ظريره
وراع الولع يشبه من الناس سبار=ينشد ولايخبر بخبره لغيره
ينشد عن الديره وخص(ن) للاقفار=لين الاثر يجوز له باتعبيره
حيث الديار اللي بها بدو وابيار=يضيع بين الوارده والصديره
ويراقب الارياح كنه برادار=يطلب عسى جوه يوقف ذريره
يطلب سكون الريح من كل الاقطار=من شان طيره يستريح بمطيره
ليلة يبات بدار محد(ن) بها دار=ماطبها الدايج وصافح وزيره
مايقلد اللي جالس(ن) بين الانوار=عينه على الشاشه ويمقد عصيره
بين الكنب ومشغل مكيفه حار=والى تحرفض قام يرقص سريره

لوكان راع السوالف قبل صفاها=جنب خرافاتها ثم ذاع صافيها
ماشفت ناس(ن) سخيف الهرج عناها=كلف وولف لها من شان يوذيها
والله من كلمة(ن) في غير معناها=سحبت ونسبت لشخص(ن) غير راعيها
واللي نسبها بها حرف ووفاها=وابلش بها واحد(ن) ماله دخل فيها
سوالف(ن) تبلش العاقل بعمياها=لوهو نساها يجي له غوج يطريها
لوحاول بخسرها من ضعف مبناها=لابد يظهر لها شلات تبنيها
حيث ان راع الردى نفسه مزاياها=هرجه يقفي بها وهرجه يجي فيها
لوهي بفاتورة(ن) والبايع امضاها=ان كان يعثر على البايع وشاريها
لكن سهمه وضعف العقل غذاها=سود الضغاين له الشيطان باليها
كم ناس جاها بلاها من دناياها=وكم عين قالو عماها من مداويها
واللي يجامل على العوجا ومبداها=مع طول الايام لابده يلاقيها

ياناس لو عميا البصيره لها علاج=لاشريه باللي يملكنه يديه
من شان مني مايجي غيري احراج=وعميا قبيلي ماتمشا عليه
يبصر بها قدام تثمر بالانتاج=قدم العلوم البينه والخفيه
قدام علم(ن) ينقله كل هراج=يمشي به الرجلي وراع المطيه
وانا على العوجا اجامل على ازعاج=وكم نفس راحت للمجامل ضحيه
وعوجا الرفيق انا احتملها الى انعاج=الاوله والثانيه له هديه
والثالثه كانه على امواج وامزاج=ماني طبيب اعصاب اوعاقليه
أدخله موضوع مامنه مخراج=واقفل عليه فجوج نجد الفضيه
وراع الخطا ياخذ من العمي منهاج=ان كان كل(ن) جامله بالخطيه
راع الخطا ودك تطقه على حجاج=من شان ماتغتر فيه البريه
تشوف زول(ن) مرتكز كنه سواج=وهرج(ن) يقوله لون قارة طميه
واللي يقول العلم ولا انشد عنه لاج=انا اعتبر وجده على الكون سيه
واجب يطعم عنه تطعيم الاسماج=جرثوم سامج علته داخليه

ياللي تقول الدور هذا تغير=الدور ماينلام ينلام راعيه
الدور ماحط الضحيه قصير=ولابدل ايامه وخلا لياليه
لكن راع الدور ريش وطير=والله اعلم وين ريشه يوديه
اصبح بموضاة(ن) يضير ويضير=واصبح بمبدا يختلف عن مباديه

يتبع

ياكامل الزين منك الروح مخطوره=منكم خطرها ومنكم طبها الواقي
بالليل اشوفك خيال وكامل الصوره=وان قمت حسيت شوفك بعد وفراقي
والود ماهو طباشير(ن) بسبوره=يجري مجال الخطر بالعرق ينساقي
من يوم صادفتكم والروح مكسوره=كسرة شره من عزيز(ن) فيه انا شاقي
لودمع عيني يزجه بيب ماصوره=مادبره من يروسه باول الساقي
الناس بالناس منهيه وماموره=وانا معك بس لامنقي ولا ناقي
لدي لنا بالنظر يانور مشكوره=والباقي الله وغيره ماحد(ن) باقي

(الشرفا) أحد النياق العزيزه على الشاعر

يالجمس وش بك تكدر خاطر الشرفا=عقب الضحا اقفيت من عنده بغاليها
اقفيت وقلبه يصفط كنه الزرفا=عج الدواليب عن شوفه يتقيها
مع دربكم تطمر العثمور والجرفا=بقيادها بآخر السرعه تباريها
والود بلوى وود الوالده يرفا=والوالده بالموده ماتحليها

ماجور ياللي في عشيرك تفاجيت=كم واحد(ن) مثلك بخله تفاجا
فاجا وسوا به مثل ماانت سويت=وغير وناستهم عليه انزعاجا
أقفت به اللي لاسرت تشعل الليت=يقلع مديل(ن) وردوه الخواجا
انته خطير انك ليا ابطيت سجيت=لك ناس من ناس(ن) عليهم تعاجا
عينت نمر وقيس هاك الزناتيت=خلا بهم وسواس نوع ارتجاجا
ياذيب كان ان الهوى مثل مااوحيت=عشرة زمان اليوم فيها انسماجا
عشرة زمان اليوم تنهى ليا اقضيت=وتفتح بهرج(ن) بس يعلج علاجا
ومقاطعة وش جبت لي وش تقضيت=كن الهوا من بينهم بالحراجا
تنظربساعتها ليامنك ابطيت=عجل ثم اطلع جاك موعد حباجا

ياقلب طبع المجامل عنك كنسلته=يوم ان حصل لي من المذكور مااكفاني
كم حمل غيري من اسبابه تحملته=جاملت مخطي وتالي صرت انا الجاني
واثر المجامل الى منك تأملته=ديكور هيكل ولكن دوت سيساني

ياراكب اللي دورت بالمدرج=مستعجل الرحله بسرعه شلعها
تنصا سواد وجو صافي من العج=فوق المقير له مسافه رفعها
ماتشيل ظرف ماعنه عذر يهرج=منصاه زبن اللي عداته هزعها
سلم عليه اعداد من فوقها سج=واعداد ماتسمع سموع(ن) سمعها
يذكر لزوم عنه الاضلاع تنفج=كم من مجلد بالضماير طبعها
اقطف زهور فوقها المي يدرج=واترك زهر زراعها مازرعها
ولاينفع الخواف بعده ولوهج=كم واحد في شور هرجه بلعها
دنياك هذي يالسنافي تحدرج=ماينعرف صحيحها من دلعها
ان شفت مشاها والى المشي يرتج=وان شفت اهلها قلت ريض طمعها

دوك السويك ولمس البارد الحار=خل المحرك يرفع الزيت للروس
والى رفعت الماص مع قدحة النار=بمحرك ماجمعه سيف طرطوس
عرف عليه بميزة كارها كار=بستم وثلاجه وللقير بتروس
لاشافه اللي بايع دار في دار=تناولن قلبه ثمانين هاجوس
اسبق من الللي زته الملح لاثار=فرصه ونادسها ورا الملح نادوس
بالرمل والكنه وكنه على القار=مهما تعرض من غرابيل وطعوس
ياراكبه وصل سلامي بتذكار=يم الامير اللي كسب كل ناموس
راع الفعول الطيبه سر واجهار=ضدالعيا وان كان هب الهوا كوس
ماراقب النمات مع كل سبار=ولاروج النمات مع كل حاسوس
عقب العقاب اللي على ضد جبار=حلال قالات بها الحبل ممسوس
قالات يوم فيه صوت على النار=من سطوته توخذ تقارير ودروس
يشهد له التاريخ في ماض الادوار=من الساحل الغربي الى شط قابوس
يامير بالتكرار تم اربع ادوار=دور رمضان اللي به ابليس محبوس
اوجز لنا الموضوع ياامير وش صار=والجزل منكم ياهل الجزل ملموس