ديوان الشاعرعبدالرحمن بن عاتق البيضاني (راحل)

تشتاق روحي لعذب القيـل=والقاف لو انتحى ما ابعـد
اشوف قلبي عليـك يميـل=ومن جاور اهل السعد يسعد
شوقي معك واصِل الإكليل=وعذب المعاني برق وأرعّد
يامُنتهى الذوق والتكميـل=كلآ حسب مصعدُه يصعـد

اهلا هلابـك ابوعاتـق=يامدرسه في طروق الفن
الخير والعـز متلاحـق=واجب علينا نسوق البن
يوم الجفا للوفا سـارق=ماعذب الانس غير الجن
بين الوهم والامل غارق=ياليت الاقدار لي تحـن
عداد مـا يُعبـد الخالـق=ترحيب يا جيـد المعـدن
نمشي على الطيب ونسابق=حسب العوايد واهل القـن
اوصيك يالصاحب الصادق=لا تلتفت للوهـم والظـن
ما يصفي الوقت للعاشـق=لو في قصور الترف يسكن

سـلام مـن فـوق عليّـه=يابو شري اسمع الونـات
ليّه عن الوصـل حوليّـه=ودموع عيني على الوجنات
يا مرحبا الف رديـة=تنصاك يا بادع الابيات
أخبُر سياستك دوليـة=ما تنغلب طيلة الاوقات
شهور وايام مطويّـه=خبرها ساعته ما جات
عسى عندك خبر ليّه=يخفف عني الويـلات
مدري عن اسرار مخفيه=للآن ما بانت الشكـوات
وقلبي معك مخلص النيه=ان كان عندك حقيقه هات
قصور فالحلم مبنيـة=وفيها مقصدي بالذات
اشوف ايديـه فيديـة=وعينه تسرق النظرات
فالحال ارسل وجيهيـه=حسب القوانين والعادات
غرائز الحـب نفسيـه=حرمانها يسكب العبرات

سلام وانت لنا مكسـب=والبث ثنتيـن موجاتـه
لا جاتني حزت المغـرب=زادت على القلب ضرباته
حييت ياالصاحب الأعذب=يشكي لنا مـر آهاتـه
ظني بخط الوصل كهرب=حذراك من شين صعقاته
دستور يا عارفين الطـب=شفت البحر يقذف امواتـه
وبعض البشر يقتلون الحب=من بعـد تجريـب لذاتـه
حلَّين ماعَنُّهُـم مهـرب=والسبع أعْرَفْ بقدراتـه
اللي عذا منهله إشـرب=ومن لاصِفِي عاف كدراته

حبة خشم والغلط مرجوع=تعود الميـاة لمجاريهـا
يهمني كاتب الموضـوع=من حـرب ولا معاديهـا
الصلح بين العرب مشروع=سنـة ونعـرف مباديهـا
واما المعادي هنا ممنـوع=لو طـب رجليـه نثنيهـا

من دفتر الحب صور لي=الدرس الاول ورسماته
ابغى اتفوق على الكلي=واجيب اعلى دراجاتـه
على حسب ما تباينلـي=واللي لقيت فى سجلاته
الخل لا ستملك الخلـي=وسيطر على كل خاناته
يصبح على الكل متعلي=ولا حي يقدر مجاراتـه
وعلى كذا يصير متولي=وفارس على كل ساحاته
وصلني الشرح بالملي=والقلب زالت معاناته
وبدعي لكم كل ماصلي=يشملك ربي برحماته

الله يـا مركـز النـجّـار=بالليل يـا كثـر نسوانـه
سألت نفسي وش اللي صار=قالت ترى العيـن خوّانـه
خلك عنـد الفتـن صبّـار=لا يغرك ابليـس واعوانـه
خسران من يسرق الأنظار=كل شـي يكتـب فديوانـه
لا يغرك السـوق والـزوار=كل من دخل جوف جدرانـه
دور على الي سكن بالـدار=ما هي على الشوف ولهانه
سواق يدلف وزوج حمـار=واليا الفرس ضاع برسانه
واللي يتذكر عـذاب النـار=يغض البصر ويسحب لسانه

لله حكمة .. في تدبيـره=ما عاد طير الزهر ينشاف
راح الزهر مع عصافيره=ديرة دهر والسنين عجاف

مذموم فينـا قليـل المـال=حتى على الحق ما يطولـي
يا خوي قصر الزمن أو طال=الكل على النعش محمولـي

يا طير يللي بنيت العش=ما تدري ان البنا زايل ؟؟
اتعبت نفسك بجمع القش=انحش ترى غصنهم مايل