يابو فرح يوم الضريغط دعاني

يابو فرح يوم الضريغط دعاني
جيته بعصما فارقه عن سواها

تليق في حضرة عريب المجاني
الصبح يسمع بالمجالس صداها

والله لو ماطيب راسه شعاني
وحرك هواجيس القصيد وشعاها

ماجبت من خلف الضلوع الحواني
فارع تنال اعجاب منصف قراها

سلام مثل الهيل والزعفراني
في دلةٍ نقع الشهاليل ماها

منوة معومس من غثا الوقت واني
بعد الديار بخف رجله وطاها

مدح الكريم الوافي المرحباني
النفس يالحضار غاية مناها

عبدالله العوده مكانه وشاني
الطيبه من طيب راسه خذاها

مجالسه تجذبك بين المباني
لضيف والجيران شيد بناها

مدهال للوافين قاصي وداني
وان مر هتاش الصحاري نصاها

سلايل اللي بالرصاص العماني
تكسر صليب عظام شيخٍ غزاها

عنوز لاركبو بنات الحصاني
سقم الحريب وسعدحين رجاها

واهل وفى وكبار قدر وصياني
منهم مصوت بالعشاء في دجاها

ميت وذكره حي عبر بالزماني
مرحوم يامن فيه ربعه تباها

جمع العنوز اهل النمش والعناني
عزوه يذري بالمخاوف ذراها

وقصيدهم يسمو بجزل المعاني
ثلاث شيخات القصايد حواها

ليه بهم جار وصديق وعواني
وخوه على طيب الفعول ونقاها

قلت الصحيح اللي حكابه لساني
شاعر وكلمة حق مبغى جزاها

النفس ماهي ضاريه لطماني
اعزها وردها عن خطاها

رجال عن درب الردى والهواني
ابعد من نجوم السماء عن ثراها

تسجيل تواجد في منبر الجزاله
صح لساانكـ
بيض الله وجهك

صح الله لسانك
ولاهنت
وسلم فكرك وبنانك
دمت برعاية الله وحفظة

صح الله ابدااااانكم

الله على المعزوفة الموسيقية والتحفة الفريدة الاثرية
كلمات شامخة كالنخل وراسية كالجبال حروفها كالذهب والالماس والياقوت والمرجان
لاغرابة من شاعر وفارس الميدان الرائع الراقي ابو تركي
صح لسانك مليارات

	المشاركة الأصلية كتبت بواسطة حسيـن

	الله على المعزوفة الموسيقية والتحفة الفريدة الاثرية كلمات شامخة كالنخل وراسية كالجبال حروفها كالذهب والالماس والياقوت والمرجان لاغرابة من شاعر وفارس الميدان الرائع الراقي ابو تركي صح لسانك مليارات

شهاده عتز فيها يابن العم وعساني دايم عن حسن ظن الجميع