ديوان ابراهيم القرون

لازان هوجاسي وقربت الاقلام = واخذت لي من طبخة الكيف دله
قربت مايطرى علي لو ورى الشام = الين ياتيني من اقصى محله
واليا بديت ابدي بهامات الاهرام = واقطف من البستان ورده وفله
مانعرف الشهره ولانعرف اعلام = ولابعد شاركنا سطور المجله
لكن لوبنشهر على الساحه حسام = ماعاد للشعار سيف تسله
ماني خلف هذال ولا ابن وسام = مير الطريق اللي مشوا به ندله
يامرحبا عد الليالي والايام = يامرحبا ترحيب خل بخله
يامرحبا ترحيب مثل الذهب خام = يصرف على الحضار والحفل كله
حياكم الله عند شيخ ومقدام = مقدام والماجوب مايستجله
اليا دخل سوق المواجيب سوام = يوم ان بعض الناس ماجاه لله
رقمه يزاهي فالكرم كبر الارقام = وتدله الضيفان من طيب دله
عادته مايجمع من الفضه جرام = وجمع اللحوات الغانمه عادة له
الجود عد والمناعير هيام = ومن دون ميراده هضاب مطله
ومن دونه الموت الحمر رفرف وحام = وقام الردي يمسح دموع المذله
وقام الوفي وقال قدام قدام = وكافح على الميراد حتى وصل له
هذا لياصكت عليه العرب قام = وهذاك خله في معشاه خله
يالله عسى من خلفه للترحام = في ظل ربي يوم لاغير ظله
مانلام في مدح الرياجيل ماانلام = لاصار عندي للدعاوي ادله
وختامها صلوا على سيد الانام = اللي شرع للناس دين ومله

هذه القصيده قلتها في اجتماع للقبيله عند العم محمد بن ابراهيم في الخرج وكان في الاجتماع عدد من الشيوخ
وعدد من الشعرا من ضمنهم محمد بن ناصر بن مظهور وعبد الله بن زويبن وزيد بن مبشر الحصني الذي قال قصيدته
في المناسبه كذلك وتعد من اجمل قصائده التي نشرها في ديوانه

يابدر حالي يتعب اليوم يابدر = انته ونعم ووقتنا ماهو ونعم
الرجم عديته وانا ضايق الصدر = والهم بمقفاي من رجم في رجم
اثر الزمن غادر وانا ما اعرف الغدر = واثر الزمن ظالم وانا ما اعرف الظلم
وقف بوجهي مثل ماياقف الجدر = وانا ضعيف الحال ما اقدر على الهدم
شفت الغثا والشين من وجهه الودر = مايدر اني قرم ابن قرم ابن قرم
ببقى الين يغسلوني من السدر = على سلوم ابوي ما اترك ولا سلم
يابنت وجهك ويش فرقه عن البدر = فيك الجمال ولون بشرتك والجرم
وصوفك الثنتين عذرا وفي خدر = وخصالك الثنتين الاناه والحلم
خلاك وصفك فوق واهل الهوى حدر = وابوك شيخ الجاه والمال والعلم
ما للعذارى بعدك بخاطري قدر = الشمس لاطلت تغطي على النجم
قلبي بحر وانتي بوسط البحر در = واللي يغوص بغبة البحر ماسلم
مير اشربي حالي وانا بشرب الكدر = ولا اشعمي النيران في داخلي شعم
لو راح دمي بين كل العرب هدر = الموت في حب المزايين له طعم
ياعاذلي لف بخداعاتك ودر = ماني مكلم راعي السب والشتم
بفخر بها وافخر بتوصيفها الندر = فخر الصويتيات بمحيسن الفرم