ديوان ألغاز الشاعر / علي بن زيد الفريدي (رحمة الله عليه)

انشدك عن بنت بلاذنب تلوى = وتحط في فم حرمة تقل حيه
ومن بعد هذا يجي لها طير شلوى= ويقوم ياكلها بعين جريه
ثم تنقلب ورع مفيد وسلوى = يجود في نفسه بنفس رضيه

= محلول= المغزل والتغزاله والعميته من سعد المحمدي

وش الذي ممشاه في حكم باريه = ومشيئة الباري تخليه تايه
ماصلّح براسه مقفاه يخفيه = معروف من مبداه حتى النهايه
واقرانه اللي بالفعايل تحاليه = مخالفينه بالفعايل بشايه

= محلول القلم الرصاص= من سعود

انشدك عن رجال كل تمناه = ولاشفت مخلوق بعقله يسبه
واللي يحبه عذبه لين خلاه = مشوه يصعب علاجه وطبه
ثم نتفه تنتيف تقل يتحداه = واللي يزيده موت فوق يصبه

= محلول= الجمري من غدير فهد الوهبي

انشدك عن رجل ليا نادى يقول = تفضلوا ترى الغنيمه جاهزه
نداه له معنى وميعاد ووصول = لبنت على على جزل المغانم حايزه

= محلول المؤذن للصلاة= من سعد الحصني

انشدك عن رجل وقف لك بالطريق = تجنّبه والا وقعت بمشكله
لاهو عدو ولاغريب ولاصديق = ولاهوشراب ولاطعام تاكله
بطنه كبير ولايزود ولايضيق=ولايخاف ولايتهاون بعمله

=محلول دوار الطريق= من الساري ابو شمس

ويش الذي في كل الاوطان مرغوب = مكرّم مطلوب في كل ديره
ليا جا مع الماجوب تكميل ماجوب =سمي ملك في داخل المستديره
ليا عكست اسمه لقيته على الثوب = وعلى انواع من الملابس كثيره

= محلول الرز= من سامي الفكر

انشدك عن رجل ليا اكرمته اوذاك= يزعلك وينقدك يا محسن له
والدين واللي مرسل فيه وصاك= يقول سل السيف ثم استحله

=محلول الشارب=من عشير النشاما

انشدك عن رجل يقول ولايطول= الا ان كان الله على الحكمه هداه
يقول حق ومنطقه على وصول = ويقول باطل ويتمادى في وذاه
ويشجعه بعض العرب باللي يقول=ويعارضه مثله وقوله هوجداه

= محلول الشاعر= من العضيد ابو طلال

ويش ورع نصّبوه وصار حاكم=للثلاثين وبهم واحد ازياده
يدخل الميدان والجمع امتراكم= وياكل اللي فيه لوفيهم عواده

=محلول ولد الحكم= من سعد الحصني

انشدك عن رجل على زايره جار= ليا اعتلاه الضيف تنهى حياته
طوله حسب ماقيل ثلاثة امتار=وعرضه مثل طوله ويخلف مباته
يؤمر على المأمور قصّاف الاعمار= ويقال هات فلان لفلان هاته
هذا في وقت يوم دوره له ادوار= واليوم ما يذكر ونجهل صفاته

= محلول النطع(بساط الاعدام)=من العـــضيد