ديوان كسرات الشاعر / عبدالرحمن مساعد بن شريان الجحدلي ( الذراع )

رسالة تهنئة بحلول شهر رمضان نسأل الله أن يعيننا على صيامه و قيامه إيماناً و إحتساباً لوجهه الكريم من الأستاذ المربّي و الأديب الخلوق


علي بن سليمان ابوعسم

في حروة الصوم و هلاله=والكل في طلعته مسرور
شهر التقى بان إجلاله=من فرحته فالليالي نور
عساك تسعد بإطلاله=وتنال من أجره المأثور
وتعايد الناس في كماله=ويعيد صومه عليك شهور

الحمد لله الذي بلّغنا و إياكم رمضان ، كل عام و أنتم بخير

رديت للأستاذ علي بن سليمان ابوعسم وأفادني أن الكسرة متداولة ليست له و قلت في ردي عليه :

يهنالك الصوم و افضاله=مقبول يابو حسن مأجور
الله يعيدك على لياله=بالخير و صيامكم ميسور
كل عام تبقا على الطاله=والعافية و العمل مبرور
تفرح بتكميل أعماله=وتفرحبها في جنان الحور

قال الشاعر/ طارق حميد الفارسي

يا خوي ما عاد ليّه حظ=قايست ما كان فقياسي
بنيت بنيان ثم انقض=بنيان وإنقض من ساسي

رديت له

حظك متى ما عثر ينهض=خل الأمل لك نبراسي
إصبر يجيك الفرج أبيض=يجلى أسى حظك القاسي

طارق

صبرت حتى جعلته فرض=من دون همي وهوجاسي
تخالفت كلها بالعرض=حتى بها ضاق مجلاسي

عبدالرحمن

ما يعود ما فات ويعوّض=بالخير من خالق الناسي
الهم بلى صاحبه يمرض=ياحظ مهموم متناسي

قلت للشاعر / عبدالرحمن محمد عتيق بن عاتق البيضاني

حضرت الاوراق واقلامي=حضرت كامل دواويني
بارفع يابوعاتق اعلامي=باهديك اغلى بساتيني
احترت في طيبك الطامي=يابن الفهود السلاطيني
طيبك على اصلك السامي=اللي رجح بالموازيني
في ساعة الخوف مقدامي=مثل الصقور الشياهيني
كريم في عسر الايامي=لاجوادها والمساكيني
ماشي على دين وصيامي=عاداتك الحلم والليني
الله يثيبك على اكرامي=ويكفيك شر الشياطيني

قال الشاعر الفاضل العميد / عبدالحكيم قابل بن مبيريك الغانمي

سلام واحنا بكم نعتز = يا مطوّع القاف ياشيهان
ما يوم ميقافكم اهتز = تستاهل انت مية نيشان

رديت له

يا مرحبا قدركم أميز = تفداكم الروح والأعيان
إنتم أساس الفخر والعز = من شانكم جيت للميدان

قال الشاعر / ماجد عبدالله الجدعاني ( ابو مديدة )

نبغى المثل فالمصافا يكون = حسب القوانين والساير
يا راعي القن والقانون = سلام يا حضرة الشاعر

رديت له

شرح الصفا بيننا مضمون = يا صافي القلب والخاطر
القلب من طيبكم ممنون = يا مرحبا خاطري شاكر

رد ماجد

تبقى ويبقى الذي يفتون = أمثالكم ردهم ناير
لا زال قلبي يعيش غبون = كل يوم في عند ومشاجر

رديت له

دنيا أصل حرفها من دون = واللي ورد بحرها صادر
لكن على طيبها يثنون = أوصيك بالصلح يا ظافر

قال الشاعر/ عطيّان بن زاهي البلادي :

سلام بالفل و الكادي=ومحللينه بموية ورد
عبر الهواتف و الأرصادي=يضفي على المجتمع و الفرد

رديت له :

يا مرحبا و السعد بادي=لقدومكم يا رجال تعد
جيران وافين وانجادي=يااهل الصفاء و الوفاء و المد

قال ابو عاطي :

عسى البقاء و الله الهادي=مد الوفاء بيننا مقصد
جانا الخبر و الفرح زادي=بحضورنا عندكم نسعد

قلت له :

يااهل الوفاء غرّد الشادي=بأطيابكم من قديم العهد
الحال و المال ينقادي=مني لكم مد ماله حد

قال الشاعر / معيض بن وسيّود الكرشمي العتيبي :

الله هو الرازق الراحم=نسبّح لوجهه و نشكر
سلام مني لابو داحم=أحلى من الشهد و السكر

قلت له :

يا مرحبا قدركم لاحم=مع هاجس القلب لا فكّر
يمشي مع الدم و يزاحم=يا معيض يا طيّب المذكر

قال الشاعر / حسين بن حميدان العوفي :

مرّت سنه و العمر يجري= سنه جديده بديناها
ولاظن فينا أحد يدري=نموت ولاّ نتعداها

قلت له :

هذا السنه سنة الغدري=هلت و شفنا ضحاياها
راح الحريري رحل بدري=ملامحه ما عرفناها

قلت

سلام مني يا جيراني = واللي لفانا على الصيوان
عن طيبكم يعجز لساني = جيران أقرب من الأخوان

رد الشاعر / دخيل الله حمود الجحدلي

يا مرحبا بهل الالحاني = تعداد ما تثمر الاغصان
أهل الوفا فعلهم باني = عساك سالم يابوشريان

رد الشاعر / غازي حامد بن سعود العوفي

يا مرحبا بك وأغراني = طيبك وحبك للجيران
يارب لم الشمل ثاني = عساه يعمر مدى الأزمان

قال الشاعر / محمد عيد بن رده بن فرج الخال

سلام في عيد عام الفين = يضفي على الكل مثنيه
واكرره عد شوف العين = يااصحابنا يا غناويه

رديت له

يا مرحبا بك فالعيدين = ياصافي القلب والنيه
الله يزيد الفرح مثلين = ويعيدنا كل حوليه

قال الشاعر / أحمد عبدالله الغانمي

واقلبي اللي ضناه الود = خلاه حاير مع اشجانه
كل ما بغى يرتوي من عد = يحتار في طي مرجانه

رديت له

الود يااحمد غزير المد = لا تميل في غمرة احضانه
ون ملت احذر تجوز الحد = من جاوزه ضاع ميزانه

قال الشاعر / حامد محمد الذروي

يا بو روان التحية لك = باللي لفا فالوجود وجد
يسعد بها كل من حولك = وروان بوجودكم تسعد

رديت له

أشكرك دايم على فضلك = سبوق ما تنلحق فالمد
تدوم والطيب من أصلك = يفوح مثل الزهر والند

قال الشاعر / خالد عبدالخالق الخلال

يا صاحبي ضاق بي صدري = أمسي وأصبح على الهوجاس
لا وين بصبر على صبري = والقلب زايد به الوسواس

رديت له

لاباس يا صاحبي مدري = باسباب شكواك والهجراس
شاللي جرى واشغل الفكري = وخلاك بعد الصفا تحتاس

خالد

أشرب من المر والصبري = واقول يا خاطري لاباس
بكرا يدور الفلك وشري = وجعل حياتي سعد واوناس

رديت له

إسعى وحث الخطا بدري = وثبت مواطيك يا قرناس
من جد فالجد ما يزري = يكسب سعوده وطيب الناس

قلت

قلبي غدا للهوى با يعود = ياهل الفكر اسعفوا قلبي
تاه النظر فالعيون السود = والخد والمبسم الرطبي

رد الشاعر / هزاع صالح مفرج

سهم النظر للمعاني قود = عزيز لجلك ومتربي
قوم افتكر يومك الموعود = لاتقول الايام تلعبي

قال الشاعر / احمد محمد صالح بن عاقل الغانمي

محتار في داير القانون = اللي خلف قن ماضينا
اللي حصل بيّح المكنون = كيف الصبر كيف ياخينا

رديت له

ادرى على السالف المسنون = ان ضاع ضاعت معانينا
لك رب مشرف على ما يكون = مع الصبر ما يخلينا

قال الشاعر / أمين عبدالحميد عبدالمعين الجحدلي

قلبي تشوّق وصار يحن = لا صحاب يم اليمن ناحين
الود ودي أسيب الأمن = واروح يم اليمن ذحين

رديت له

اصبر على الحال لا توهن = لا بد يوم الرواح يحين
لا تخل عزمك كذا بالظن = وتروح لهل اليمن مسكين