ديوان كسرات صقر المقرح

كونك تمنّعت وتماديت= واسقيتني المر بغرورك
ما يهمني وش كثر سوّيت= بقدر ما يهمني حضورك

وحشتنا يابيان الصمت= وش فيك يامطوّل اغيابك
يامن فبحر الصداقه عمت = مرفوض هجرك لأحبابك

أجبرتني اقتنع بالطّيف = وأبكي ليالي الصفا وانعي
ذبلت ورود المحبّه كيف= من بعد ماسْقيتها دمعي

دمع الأسى من عيوني سال= والمنطق اهجرْك وأخونك
وما وديَ ادخل معك فجدال= والقلب مأسور فعيونك

مـن بـاديَ الـوقـت والأيــام= والطـفـل عـايـش بـأحـلامـه
بـرئ يضـمـن لــه الإســلام=كـامــل حـقـوقـه وإســلامــه
واليـوم فــي عـالـم الـظُـلاّم=يمشـي علـى كـيـف ظـلاّمـه
صرخة الم تحتوي استفهام=ليه الطفل تشنـق احلامـه ؟

كُل ما سطع نور في دربي= تزيد اكثر معاناتي
ليه الزمن بس ياربي=ماشي على عكس رغباتي

صابر ودمع الأسى يجري= اظهر رضايا مع خضوعي
اشتاق لك وانت ما تـدري= واخفي الم داخل اضلوعي

عبدالعزيز الزويهري

لي قلب عاشق يحب انسان = و راسم جميع الأماني فيه
لكن حسافه على ما كان = عيّت ظروف الزمن ترضيه

.
.

صقر المقرح

ماحد من الناس يالشيهان= يحصل على كل ما يبغيه
مير الأمل شمعته برهان= تفتح لك الدرب وتضوّيه

حلم الطفوله يراودني= تطري عليّ ذكريات الأمس
وهاجس الشوق ياخذني= في لحظة اغروب ضوء الشمس

كملي وانا محتمل غيّه= وابادله بالجفا اشواق
ماحد شغل خافقي زيّه= في عالم العشق والعشّاق