ديوان الشاعر / علي بن زيد الحربي

يا كريم الوجه ياسامع الــد اعــي = عالم سـري ووضعي وموضوعي
ياجزيل الـمد يامبــري الاوجـاعي = يالعظيم اللي له السمع والطوعي
يارحيم عــالم كل الاوضــــــاعي = وامرك ونهيك منفذ ومســموعـي
اشتكي لك علة بين الاضـــــلاعي =احكمت واستحكمت داخل اضلوعي
مالها من غير رحمتك مطـــــلاعي = الرجاء في غير رحمتك مقطوعي
انته المعبود والرب والراعــــــي = المرض تشفيه والهم والــجوعي
ابتدت تظهر علامات مرجـــــاعي = والحمول اثقال والعلم متبـــوعي
والليال السود ينهن الاطمــــاعـي = طالت الايام مانهيت مشــــروعي
مايريد الله يسعى به الســــاعــي = والبشر دوني وحولي ومن نوعـي
مكسبي في قدرة الله بذراعــــــي = ماتبعت اللي من الدانيه يــــوعي
غير حقي ماتمــاديت باطــماعــي = وتحاشى كل طامع ومطمـــــوعي
لااجهل الواقع ولاقـاصرٍ بـــاعـي = بس لي طبعٍ على الحق مطــبوعي
والكلام الزور مايدخـل اســماعي = ماينـــاسبني ولايــوافق اطبوعي
واتجنب هــرجةٍ مالها داعــــــي = وأجتنب رجـلٍ على الزور مدفوعي
والزمن ماينصف المنصف الواعي = مطلبه مرّ على الحـــــــر ممنوعي
لايجير ولايجامل ولايـــــراعـــي = كم كريمٍ من معـــــاديه مفجــوعي
وان بغيت اعــدّل الميل مــاطاعي = به اعناد وله محــابيل وفــروعي
واسع ضيّق لو فجوجــــه اوساعي = مفرح محــزن ولوعاته تروعـــي
انتهى شرحي وابا اصفط اشراعي = والكلام اللي على حق متبــــوعي

كل رضي عقله ويفخر بشـــوره = ويمشي على رايه ويشرح قـــراره
ويمشي برايه لوبرايـــه دبــوره = ويشوف نفسه لووجوده خســــاره
عفن الرجال اللي مهقــويه دوره = لولا الــذرا مذريه ماشـــب نــاره
ليا دخل بيته قفل باب ســـــوره = ومـع جاره الادنى كثـــيرشـــجاره
لايزور جيرانه ولاأحـد يــزوره = ولاهو من اللي يعتنــــي بالـزيـاره
في غيبته ماحد يفضل حضــوره = وليا حضر لاشــي معنى شـــــعاره
وبين الرجال ارجال عند الضروره= يثنون دون الواجبات بجــــــــداره
يم المعزّه يسلكون الوعــــــوره = لياشفت واحدهم شعرت بــوقــــاره
تلقــابهم رجـل تنــوّر بنــــوره = يعجبك في كل المـــواقف مســــاره
يعنى بامورك قـبل يعنى بـاموره = رجل مهمّه جعل تسقــــــى ديـــاره
وانا مشيت وشفت من كل صوره = وشفت الغشيش وشفت راع الشطاره
نفهم تعاريج السمك في بحـــوره = ليا تاه فيه محفّرين الـجحــــــــاره
وبعض الرجال اللي كلامه بزوره = اللي يحاول بالخفى يضــــر جــاره
اللــي يجي فـّزاع مــع البــزوره = ويرجم على الورع المطرّف حجاره
هذاك والله مــانقدّر شــــــعوره = والله فلا يسوى رماد الزقــــــــاره

الله مـــن قــلب به الهــم يزداد = وفي كل يوم يشيــــل هم زياده
مشاكل تظهرلها جذور وابعـــاد = عن حملها يعـجز قـوي الاراده
هم يغـــيب وهــم للقـــلب ورّاد = متقافيه لين اصبحت شبه عاده
عالجتها في كل مقنع وطـــــّراد = واخذت من ماض الليالي شهاده
واخذت من راي اهل العرف مافاد= وراي العوارف فيه لي استفاده
فكرت بالدنيا وهـّزات الانكـــاد = ولقيت كل فيه هم ونـــكــــاده
كم غربلت قبلي كريمين الاجـواد = وياما شكا منها عزيز السيـاده
ومن ساد باد وكل تأثيرهابـــــاد = والحي يمشي في طريق الاباده
وين الرجال اللي بنوا ساس الامجاد=وين الملوك الناعمين بســـعـاده
وين السموّل ويـن شـدّاد بن عــاد = وين الرجال اهل الصلف والجلاده
عالم فنت متعدده مالها اعــــداد = وهذا نظام المعتلـي فـي عبــاده
اجداد لجداد فنت قبلها اجــــداد = والكل يفنى مــاتحقق مـــــراده
ومن عاش في دنيا تنادي بعـواد = يموت ونفسه راغبه بالزيــــاده
وكل حياته كلها هم واجهـــــاد = ويفنى قبل ماينتهي من جهــــاده
كل يريد ويفعـل اللــه مـــاراد = القايد الاول حكيــــم القــــيـاده
ياجامعين المال من كـل مــــدّاد = من مدخل غطى بيــاضه ســواده
الممر كلّـه فيه الايام شـــــّراد = والمال كثره مــايغطي نكـــــاده
والحر تكــفيه الغنيمه ليا صاد = والبوم ما حصل على الارض صاده
ومن جاد ساد وصاحب الخير ينعاد=ومن ذاق طعم المـــــّر ماعادعاده
الله يجود ومدة الله لمـن جــاد = يلقى بها المـحتاج حسـن الوفـــاده
والاالبخيل يزيد مــاله ولازاد = وان مات يرمى مثل رمي الرمــاده
والارض مليـانه نمايم وحسّـاد = والبعض فيهم مع حسدهـم قـــراده
واهل الحسد واهل النميمه والاحقاد=حرب على أهل الطيب ما به هواده
من صابته غيره مع الخبث ينـــقاد = وباالسّر والخفيـه تعلـى جـــــواده
والخبث يظهر له معينين واولاد = وجذور وخيوط وخفي عنــــــاده
والشرله عدة مــكامـن وروّاد = ويمشي مع الجهّال واهـــل الـبلاده
ولياتمكن جاله اولاد واحفــاد = ولابد من لـجــمه وشـــدّة قــــياده
والزود لوانه من اطايب الزاد = ليا دخــل جــسم بـه الشـــّر زاده
والخير له ناقل وللعلـم نشّــاد = والصبر لحظــات المكــاره عباده
وابن البلد مايرتضي غيره بلاد = يصبر على حرّه ويرضى بـــراده
وللشّر حصّـاد وللخير حصّاد = وكل يبي يجني حصيلة حصــــاده
وان جاء نهار فيه عاصي وشدّاد=يضيع بالهيجا خطــات البيـــــاده
والكذب ضعف وراعي الكذب ماساد= نقص على الراوي ونقص اسـناده
حبل قصير ومن تزين به اعماد = يضيع في ليل طويل هـجـــــــاده
ياهل العقول المجد ينسب للامجاد= وكم فارس طيب عثر به جــواده
والجود ما يحسب بدلــه وبـرّاد = الجـود له مقياس والطيب عـــاده
ولاللعزيز بديرة الــذل مقعــاد = والرجل يقضي حاجته من ازنـاده
والخبث يبغى صدّ وبعادوخمـاد = قدام يســري ويتكــاثــرفســــاده
عليان يشعر بالمغثّه من اقـــراد = والنّمل سرّا عنتره من بــــــلاده
والنّامس اضعف جند قاتل وجلاّد = وليا ابتلى الانسان سبب هجـــاده
ولاللمشاكل والمسرات ميعـــاد = ولايامن الاحـزان بيت السعـــاده
هذه الـدنيا مســاداة وعنـــــاد = ونظامها للخلق حتى نفــــــــــاده
وهذ ماعندي والمعاني لها ابعاد = والعذر عن قـول الخطــاوالاعـاده
وصلوا على من قاد الامه للارشاد=اعداد ما خط القلم في مـــــــداده

في طيب القول لي مقصد ولي غـــايه = سيفي لساني ولي بالقول حريه
قول العوارف تشعب مالــــه انهــــايــه = ولاكل ناطق يوفق بالميــه مــيـه
من صاب قوله تراه يصيب في رايــــــه = ومن تاه قـوله تصـير ارياه مجفيه
بعض البشر فيه راي وعرف وهـدايــــه = لكن بعض البشر بواطنــه ســيه
والبعض فيهم حكيم وعنــــده ادرايــــه = يملك جزيل الكلام وصـافي النيه
لكن بعض الاوادم منــــــطقه تـــــــايه = يتعب على الهرج والاهداف ملويه
اما يكون الهدف تضليل وغـــــــــوايـــه = ويوجه النــاس لاشيا غير مـرضيه
في منطقه يعجب الجـهـال با غـــرايــه = رجال في ظاهره في داخله حيه
والاتكلـــــــــم نفــاق وزود وصـــــــايه = ومن الطــمع كثر الروحات والجـيه
ويردده عنـــد بيـــاعــه وشــــــــــرايه = ويفخر بقوله عسى تزلف به الطيه
مبدا المنافق يخالف كـــل مــبدايــــــه = ذلـــيل كاذب وكل أريــاه ســـلبيه
انا احترم من صدق لوهــــومن اعـــدايه = واكره اسلوب المنافق لوقرب ليه
والآخر اللي كلامه سب ووشــــــــايه = لاجل يتطفل على بعض الطفيليه
يجيب هرجه ويـــرجع منك بحكـــــايه = ويـحط عنوان للهرجه ومـــاريـــه
ينقل لي الهرج كنه يطلب ارضــــــايه = ومني يودي كلام زور رديــــــــه
عينه عليه ولكن يرصـــد اخطـــــــايه = وان كان ما خطيت صورها خياليه
فرق تسد غايته ويسوقها اهـــوايـــه = يوهم بنصحه وهو قايد حــراميه
بينت للي سمع رايي ومغـــــــزايـــه = مبادي ماتناسب مع مبـــاديــــه
بالناس جاهل وفيهم كـــيد واعصــايه = وفيهم اضعيّف وفيه افعال كيديه
وفيهم ارجال تدير الــوضع بعــــــنايه = اهل ملازيم مكشوفه ومخفيـــه
منطق سليم ووفاءللدين حمّـــــــايه = تسرك افعالهم ووجيههم حـــيـه
ارجال لهم بالمواقف ترفــع الــرايــه = راية محبه من الاعماق مثنيـــــه
هذا كلامي وكـــل انسان له غـــأيه = والقول والفعل مبني على النــيه

اباابدأ بذكر الوحد المطلع بالحال = عظيم الرجا اللي كلمة الحق سامعها
يجازي هل الايمان عن صالح الاعمال = ويعلم خوافيها ويعلم دوافعــها
عليم النوايا والمقاصد من الافعال = بسط سبع اراضي والسموات رافعها
انا ابا استعين الله واقيس بالمكيال = وابا اطرق مواضيع فسيحه شوارعها
امور بدت في مجتمعنا تغث البال = عسى الله بتدبيره يجفف منابعــــها
من اهمها الغيبه وترديدقيل وقال = مع الشائعات اللي مضره شوائعـــها
تلفظ بها حاقد وتسري مع الانذال = خبيث النويا كلمة الحقد يزرعهــــا
ليا صاغها في خبث يرسل بها مرسال= نميمه حقيره قاتل الله صـــانعهــــا
واشوف الحسد له عند بعض البشرمنزال= كما راية حمرا على الراس رفعها
مصب الحسد من حقد ونهايته سلال = سكن بالقلوب اللي خبيثه طبايعهــــا
ومنع الزكاه ولعبة الماكر المحتال = صفات خبيثه طابع الكفر طابعهـــا
مع اكل الربا والغش من شان جمع المال= مصادر رذيله جعل تتلف مزارعها
ومن ضمن ما لاحظت موضه مع الجهال = تقاليد من ديرة هل الكفر مطلعهـا
عقايد خبيثه خايبه تمسخ الرجال = ارجال تشابه للنساء في تدلعهـــــــا
كلام هزيل ومنطق به خزي واذلال= حركات ممجوجه يحاول تصنعهـــــا
قليل الكرامه والشهامه خبيث الفال= ونفس ضعيفه للمهازل يطاوعهـــــا
عن المرجله عاجز على المفسده خيال= يضر البلاد اللي نشا من منافعهــــا
على والدينه هم للمجتمع غربال = صفات الردى والضعف والخبث جامعها
ولااعم كل الناس بين الرجال ارجال= ارجال الكرامه والشهامه مطامعها
ارى بالاوآدم من يسمون باالابطال = ولكنّها ناس قليله نوايعها
الى جيتهم لقيتهم في مكان عال = عنيفه وقايعها جميله صنايعها
ارجال الى واجهتهم للحمول جبال = شريفه مطالبها عنيفه وقايعها
اقوله وانا لي موقع فوق راس الجال = واوضح اخلول جعل ربي يسنعها

بدأ بذكر الواحد المنفرد بالجود= جزيل العطاء رب الملا وافي المده
اله عظيم بالعلن والخفا معبــــود = رحيم رؤف يرفع الكرب والشــــده
واباابدأ كلام قبل أقوله عليه اشهود = كلام الحقيقه طاب ذكره وابا اعـده
الاول ترى الطيب على المرجله محسود = اضعاف النفوس وقاصر المرجله ضده
بعزه يسود الناس لومابغوه يسود = كثير من الحسادضده ماهم قــده
والثاني كثير المال لو مابذل مجهود = تهافت عليه الناس لويعلن الصده
يجي له خدم واعوان لوهو قليل فود= لونه وضيع الاصل فاخرك في جده
اشوف الطمع بالزود خلا الرجال قرود = قرود حبيسات تهافت على المده
ارجال الياواجهتها تفند المنقـــود = لها منطق يدخل على القلب ويشده
ارجال تحدث كلما حك عودعــود = عن الحل والتحريم وتفاخرالبـــده
اهل قلت وقلت تفكيرهم محدود = لهم قول مايفعل وعادات مرتــده
لياشافوا اللمه على مصدرمحدود = بليا تحقق بالنظر قالوا الــهـــــده
يعودون واكثرهم مع المهزله مطرود = قليل المعرفه ناقص العقل وشحده
اعرف الشهامه والكرامه لهن احدود= عزيز الرجال بعز ياقف على حـــــده
واحب الرجل يثبت على الموقف المحمود= اذاانه بنى مبنى على عـز ماهـــده
واحب الرجل سيف على الغلط مجرود = قليــل التـردد مـاهــــو وده ولاوده
أنا أكره انسان لوحضر يعتبر مفقود= اساليبه العوجاء تخطيه وتصـــــــده
اقوله وانا ماني مفوض ولامنشود=عن الناس واخطاهم وعن قاصر المده

ايالله يارزاق يارحمن يامعبود =دعيتك ياكريم الوجه ياربي تعافيني
انا بحماك وانت اللي على ماتكتبه محمود =الاياسامع الداعي من الامراض تشفيبي
انا مقصّر انا مذنب وعطفك ياعظيم الجود=وسيع ورحمتك ينعم بها حتى المسيئني
لقيت الناس موجودين مادام الرخا موجود=وليا عانيت مس الوقت كل صارناسيني
فذا يجامل وذا مقفي وذا كاره قليل الفود = يكن الكره كن الشر جاري بينه وبيني
زمان غير المذهب وعقب بالقلوب الهود =وكثر الشر واتغييربالاخلاق والديني
تفشى الخبث بين الناس والافساد والمنقود= الايالله تسترني وترحمني وتحميني
يخالفني برايي عالم تفكيرهم محدود = قليل المعرفه له راي يبغى معه يثنيني
وانا رايي على مبدا ولي بالعارفين اشهود = ليا مني مشيت الدرب لي راي مكفيني
وصلاة الله وتسليمه عدد مابلوطى من عود = على طه الرسول وسيّد الغرّ المياميني

ــــــــــــــــــــــــــــــــــــــــــــــــــ ـــــــــــــــــــــــــــــــ
قصيده بدون مناسبه فقط دعاء الله

فكرت بالـــدنيا وفيها الفكر حــــار = بــاللـــي يعـيـــش ببـرهـا وبحــارهـا
من دقق التفكــير بالـــدنيا يحــــــار = يصعب على أهل الفكر كشف أسرارها
تمشي بحـكمــة مـن خــلقها بـاقتــدار = مـتــجــددة والـنـاس تـفنى أعــمارهـا
أحـــــد يعيش بغفلته ليـــــــل ونهار = حتـــى يـــزول مــن الحــياة ودارهـا
وأحـد يطــول به الأمــل والأنتظــار = ويغـادر الـدنـيـــــا مـاكنــه زارهـــا
وأحـــد يزور ولايطول بـه المــزار = مــاذاق منـها حــلـوها وأمـــرارهـــا
والكــل وده مــن طـــويليين العـمـار = والله يـقـدر للنـفوس أعمارها
دنيا عجيبة وأمرها فيه اعتبار = يااللي تشوف اقبالها وادبارها
تعريفها ياأهل المعرفة باختصار = التفرقة بين العباد شعارها
أحد تزين له وتعطيه القرار = تضحك معه وتناوله جمارها
من حلوها تعطيه ماذاق المرار = وترخص له اللي غاليات أسعارها
وأحد بها مغبون وهمومه كبار = اللي يذوق من الحياة اعصارها
واحد بها يلقى مذلة واحتقار = وتلاوعه بهمومها واعسارها
والكل منهم له محطة واختبار = في موقف تظهر جميع اخبارها
الخلق كله من صغار ومن كبار = للخالق الديان كل أبصارها
وكل بهالدنيا لهالدنيا معار = ياخذ بها فترة ويخلي دارها
ولا أخطا الطريق اللي يشير ويستشار = بعض الرجال يصيب بعض أشوارها
وأنا حسب علمي بعد شفت الآثار = عن البشر وأخبارها وآثارها
إن الكلام إليا بدا بالانتشار = سارت به الركبان في مسيارها
والمختفي لابد مايظهر جهار = والناس مختلفة بطول أشبارها
وكل يعيش بحال عزة وافتخار = والمايلة نفسها تحب إنكارها
أحد عن الميلة يعدل بالمسار = وأحد يخليها على معبارها
وأنا مشيت ودجت في كل الديار = وكل البضايع كد عرفت أسعارها
وكد دجت في وسط الربيع وبالخضار = وكد شفت من مس الحياة أضرارها
وكد عشت بالرغبة وعشت بلا اختيار = وعاصرت ناس تختلف بفكارها
أحد لقيته خيّر صاحب وقار = يقضي على الفتنه لو أنه جارها
وأحد حليم وهو على دينه يغار = عقيدته تلقى ضمن أنصارها
وأحد كريم شهم ولغيره ستار = تعتز فيه كبارها وصغارها
وأحد حياته كلها نقص ودمار = نوعه ذكره ومحرمه هو عارها
وأحد جعله الله للإسلام عار = تضحك عليه بسيرته كفارها
وأحد حياته كلها سب وشجار = ويثوّر البندق بغير عيارها
وأحد يحسب الطايلة رفع الشعار = لكن مقاييسه خطأ مقدارها
عن واجبه والحق يلجأ للفرار = ويوزع الفتنه ويشعل نارها
وأحد سديد الراي يمضي بانتصار = حلالها كسارها جبارها
إليا قال هذا يصير مهما كان صار = وإليا نوى دار بعيده زارها
وبعض الرجال رجال في صنع القرار = ويعدل أهل الفتن وشرارها
بين الأوادم فيه طلعه وانحدار = متباينه بأفكارها وأنظارها
وإن ثار بركان الجبل فالانفجار = يعم وديان البلد وأنهارها
وإن جا نهار فيه يختل العيار = تظهر رجال فاهمه بأدورها
وبعض الرجال تصيبهم حمى قفار = إليا اختلط دخانها وغبارها
وإن طاح سقف البيت وأختل الجدار = تهتز بيوت محكمات أسوارها
والنار مصدرها ليا شبت شرار = لكن تطول الغافلين بنارها
والحر يعرف موقعه بني الحرار = وأهل الديار أبخص بعلم ديارها
يلي سبحتم في محيطات البحار = لين وضعت كل الحروب أوزارها
يوم الفلك غير مسيره واستدار = كل الطيور مبرقعه بأوكارها
واستقبل الموضوع مسئول القطار = عدل مسيرتها وبحسن أدارها
استعدلت مابه ضرر ولا ضرار = إزمامها بيد كبير خيارها
سارت على ميزان وبحكمة تدار = وتميزت في خيرها عن جارها
اليوم مانسمع كلام اللي يغار = ناس خطاها مختلط بأعذارها
اللي مطامعهم على كل اعتبار = يحرق ورقها اللي ربيب أثمارها
حنا بعون الله لها عز وستار = نغرس شجرها رافعين جدارها
نعالج الأوضاع في صبر وحوار = لكن نفجرها على فجارها
القاعدة ماهي على ساس هيار = على الصخر قامت وصلب احجارها
وصلوا على سيد البشر حسن الجوار = عد البروق وعد وبل أمطارها

مجاراةالإستاذ الأديب والباحث / فايز بن موسى البدراني على القصيدة
ــــــــــــــــــــــــــــــــــــــــــــــــــ

بسم الذي يطوي مع الليل النهار = خالق خلايقها عليم أسرارها
اللي على العرش استوى بحكم قرار = أمره بكاف ونون لمح أبصارها
اللي بنى كونه على علم ومنار = وأنشا مخاليقه وسن أعمارها
اللي رفع سبع لنا فيها قرار = زين كواكبها ونور أقمارها
اللي لسلطانه يخضعون الكبار = المعتني بصغارها وكبارها
اللي به التفكير في وصفه يحار = جلت صفاته مانصل مقدارها
بسم بديت القيل والدولاب دار = دولاب فكري دار مع دوّارها
ومن فكر بدنياه تفكير اعتبار = شاف العجب من وردها واصدارها
والآدمي منشاه من طين الفخار = تلقى معادنها بنوع أحجارها
والطينه الطينه عزى والا هيار = تبقى عناصرها حسب معيارها
وإبن آدم مسير على غير اختيار = رحلة ينفذها ولا يختارها
اربع محطات على ذاك المسار = إما ربح والا يشيل أوزارها
وأخطر مراحلها محل الانتظار = اللي يحدد نفعها وأضرارها
محطة ياخذ بها العبد اختبار = والناس فيها أجناس حسب أفكارها
أحد بها في عز وأحد بانكسار = هذا براخيها وهذا بعسارها
فيها الحكيم يعيش في حذر وحذار = وإلا البليد يسير مع تيارها
من غرّته ياخذ بها وقت ازدهار = إحلوم ليل وتنجلي بأسفارها
لو ساعفت لابد تاليها بوار = من ذاق طلعتها شكى محدارها
عقب الحلا لابد من طعم المرار = من ذاق حاليها يذوق أمرارها
عقب الخضار تشوف بالعود الصفار = يصبح هشيم بالي بقفارها
وعقب العمار يصير عامرها دمار = زين القصور تصير ضمن أثارها
وعقب الوجود يصير تاليها اندثار = ماباقي منها ياكود أخبارها
معشوقة ً تلعب على العاشق جهار = اللي يكافي شرها وشرارها
لكنها للمتقي دار اعتبار = يصبر على علاتها واكدارها
ومن لازرع حسناتها وقت البذار = يندم نهار يكيل أثمارها
يوم الوقوف بموقف صعب الفرار = والعبد تعرض سيرته بأسطارها
يوم عسير فيه ماتنفع إعذار = يوم الحساب ويوم كشف ستارها
يوم تغيب الواسطة والمستشار = يوم المساوي صعب انكارها
عن وصفها وضحت رايي بختصار = عن الحياة وسيرها وأطوارها
وإن كان أبو زيد ابتلش فيها وحار = محتار بين أشرارها وأبرارها
إذا ابتليت بقرب عفنين الجوار = اصبر ترى صبرك يزيد احسارها
وإلزم طريق أهل التقى وأهل الوقار = أهل النفوس الخيره واخيارها
أهل الطريق اللي مرافقهم فخار = أهل العلوم الطايلة وأنصارها

سبق نشرهما في وسائل الإعلام

قال الذي في عالي الرجـم عـدا=وابحر مع الهاجوس والجوهادي
ابحر مع ا لماضي بسرعه وهـدا=العمر يفنـى والليالـي اجـدادي
هذا زمـان كـل مـا جـاب ودا=هذا انتهى وآخر مع الوقت بادي
والوقت يمضي والليالـي تحـدا=وعمر الفتى مستسلـم للنفـادي
اللي قدي الـراي واللـي يقـدا=كل مصيره في مكـان انفـرادي
عينـت نـاس باللـوازم تـبـدا=كيف انتهى مفعول هاك الايـادي
من عقب ماهي للموجـه تصـدا=استسلمت من عقب طوي القيادي
واللي تعشى العود يبغـى يتغـدا=والوضع ماهـو قابـل للعنـادي
والوقت عانـد والليالـي تـردا=والسيل من وادي تحّول لـوادي
وابو حقب على القطامـي تعـدا=ركب الرديف وقادها اللي يقـادي

نويت اتكلم ضمن غيري وانا مسبوق = على كل باب وكل الابواب مطروقه
فلكن كل له طريقه وله طاروق = وكل له اسلوبه ورايه وطاروقه
يعيب الرجل ويطيب باالنطق والمنطوق =علامات عقل الرجل لفظه ومنطوقه
فهيم الرجال ليا تكلم كلامه ذوق = يشد الرجل لمتابعه شد ويشوقه
تقل يقطف المنطوق من ذروة الزملوق =كلامه مثل طيب على السامع يسوقه
اذا انه تكلم روض وليا سكت صندوق = له المستمع يطرب ويرتاح لطروقه
كلام طري لاهو بني ولامحروق = سحاب بلا عاصوف تلاعج بروقه
ولكن بعض الناس في منطقه مطفوق = يفند حقوق الناس ويضيع حقوقه
واعرف ان بعض الناس في لفظه المسروق =كثير التبجح والاساليب مسروقه
لصوص الكلام وكذبة العشق والمعشوق = سخيف الكلام قليل الملح واللوقه
ترى الشعر حّر ويعتبر للرجال سبوق = ليا قاله اللي جاهل به ضعف سوقه
جزال المعاني نادره والثمين يروق = لراع الثمين وكلمة الحق معشوقه
انا عارف اني في كلامي كسرت الطوق = فلاشك هذا واقع العلم وعموقه
ولا لي دخل والخالق يدبر المخلوق = تبين الحقيقه والمعايير ملحوقه
وانزه ارجال المعرف واعتبرهم فوق = بعيد عن الزلات والكذب والبوقه
لهم كامل التقدير والعذر به مرفوق = مكانة ارجال العرف بالنفس مرموقه
وانا اذا سمحتم لي فانا موكل مرزوق = عن اللي حضر من حرب يهدي على ذوقه
مادامه كريم وتاجر من تجار السوق = يده مطلقه لكن يد الله من فوقه