سلام يا شيخٍ عزيز المقاما

قصيدة القيتها في عزيمة ابن العم محافظ رماح فهد بن عبدالله المسعود
لمجموعه من اقاربه و جماعته
و تمت العزيمه في "روضة خريم"

سلام يا شيخٍ عزيز المقاما= شيخٍ ولد شيخٍ و ربعه نشاما
نبدا بذكر الله خير الكلاما= و نثني على اللي جوا و لبّوا العزيمه
تجمّعوا من ربع و اقراب و اصحاب= و لقوا من الداعي ابتسامه و ترحاب
نسيب و بن آخي و لا فيهم اغراب= يا الله عساها نعمةٍ مستديمه
جينا لدعوتك و قطعنا المسافات= و لاهي غريبه دعوتك يومها جات
سوّيتها و الناس لبّت بما فات= الطيب بالمسعود عاده قديمه
الطيب اخذته من هل الطيب ميراث= تحكيه للي يجهل العلم الاحداث
و هذي حقيقه ما بها زهف و اضغاث= و اللي جحدها مرتكب له ظليمه
في ديرةٍ الطّيب عاده و منهاج== امن الحديثه لين تاصل للافلاج
و من غرب تنّومه و شرقٍ الى ثاج= تلقى كرم و ارجال نخوه و شيمه
الله يديم الامن و تزيد الافراح= و عسى غيوم الشر و الغدر تنزاح
و الغيث يعقبها صباحٍ و مرواح= بالصبح نهّابٍ و بالليل ديمه
و يصير جوّه معتدل ماش طبّاخ= و الارض خضرا ما تغطيها الاوساخ
يسعد بها ركّاب شاصٍ و مايباخ=و يُقضى على راع الجشع و الجريمه
يا ديرتي دار السعد دار الامجاد= اللي حموك اهلك من آباء و اجداد
ياللي لبيت الله و قبر النبي امهاد= لا تسمعي كثر اللّغى و الشتيمه
انتي لنصر الدين و الخايف انقاذ= كم واحدٍ من ظلمة الجهل بك لاذ
و لا ذمِّك الا واحدٍ جاهل و شاذ= يسمع كلام اهل الردى و النميمه
ياللي حميتي سمعة الاهل و الجار= و اكرمتي الوافد بعقدٍ و زَوّار
مهوب للسمعه و لا لفت الانظا ر= رضاً لربّ البيت، رجوى نعيمه
يا الله عجِّل لاهل شامك بمخلاص= أيِّدهم بنصرٍ مؤزّر لهم خاص
لهم قصّةٍ تصعب على كل قصّاص= يا رب تنصرهم على ذا الصتيمه
الشام اصبح من سبايبه انقاض= ما احدٍ بعَد ذا الحرب رابح و معتاض
ما فيه غير الموت مع هتك الاعراض= و الناس تاكل من صحون الوليمه
يا رب سهِّل له على الراس مخباط= يطش راسه لو حماه بمية غاط
لنّا شبعنا من وساطات و هياط= متى نبي نلحِق لابوه الهزيمه؟
عنقه طويل و له عويانت جِحّاظ= يا ليت من يركي ارقبته على الفاظ
و يعطيه فوق الفاظ ضرباتٍ اغلاظ= و يموت مثل الشاة موته أليمه
و يجتمعوا العربان من كل الاصقاع= و نوحِّد الكلمه على كل طمّاع
و نزيل عن جسم الوطن كل الاوجاع= و الكل ينفذ ،لاجل يبني، بريمه
و نحمي بلاد العُرْب عن كل ولاّغ= و دستورنا القرآن مهوب ينصاغ
و لون الخريطه واحدٍ ما هنا اصباغ= و نصبح كما كنا بدوله عظيمه
و لا هنا للغرب سُلْطه و لا احلاف= كلٍّ له حقوقه و لا بينّا اخلاف
و لا نقضِّب مالنا لابن عسّاف= يديرها رجّال حَسم و عزيمه
و فيها نساوي بالبلد كل الاعراق= و لا نفرِّق بين تاجر و حلاق
و بدينّا نعتزّ و بعال الاخلاق= و لا نفرِّق بين قصرٍ و خيمه
ما فيه عشوائي و لا فيه أكشاك= كل البلد تصبح بيوته لملاّك
و لا فيه إقطاعي و لا فيه شَبّاك= و كلٍّ بداره له كرامه و قيمه
و نصرِّف امور البلد هي و الاموال= ما فيه تبذيرٍ و لا فيه إهمال
و كلٍّ يجَازى حسب فعله من اعمال= و لا نقوِّم بالفتن كل نيمه
و نعيش في نعمه مع خير حكّام= و نحكم بلدنا في هدي خير الاحكام
اللّي يفصل دينّا دين الاسلام= و ندحر بليس اللي بعينٍ كريمه
تحت قيادة ابو متعب كحيلان= اللّي بهام المجد له موقع و شان
سليلة امعزِّي موحِّد ذا الاطان= و عدوّنا نِجهِز عليه و نظيمه
من منطقة عرعر الى قرية الفاو= كل البلد خضرا و لا به غضن ذاو
و لا بقاموس البلد لامٍ و واو= و لا احْدٍ شكا للشرع ماقف غريمه
و لا به ربا و اللّي نحصِّل حلالا= و لا فيه ظلم و عايشين بعدالا
و نصير للي حولنا اطْيَب مثالا= و الدّ اعدانا يذبّ الخريمه
وصلوا عدد ما قدموا قهوه وشاي=على النبي اقول في كامل قواي
وردد معي صلاه يالرايح الجاي=على النبي وصحبته مع حريمه

صلى الله عليه وسلم
صح السانك لاهنت

	المشاركة الأصلية كتبت بواسطة الكحيلة

	صلى الله عليه وسلم صح السانك لاهنت

صح قلبك يالكحيله

شكرا لك على حضورك

صح لسانك مليون على القصيده
والله يـعـطـيـك الـعـافيـــــــــــة
بيض الله وجهك

	المشاركة الأصلية كتبت بواسطة الحب الباقي

	صح لسانك مليون على القصيده والله يـعـطـيـك الـعـافيـــــــــــة بيض الله وجهك

ارررحب يالحب الباقي
صح بدنك
شرفتني بحضورك

صح السانك وبيض الله وجهك

	المشاركة الأصلية كتبت بواسطة نديم المجرة

	صح السانك وبيض الله وجهك

صح بدنك يا نديم المجره
اشكرك على تشريفك

صح لسانك وبيض الله وجهك

	المشاركة الأصلية كتبت بواسطة أبو ناصر

	صح لسانك وبيض الله وجهك

اهر بك يبو ناصر
صح بدنك
و شكرا لك

الشاعر الصييفي
صح لسانك وبيض الله وجهك