دنياك هذي كم وليفٍ اصفقته !

23-03-13, 12:23 AM

بسم الله الرحمن الرحيم

رجم العنا ياما بديته و وقته=أجاذب الونات في راس لحلوح
و أقول وين اللي فؤادي اسرقته=الجادل اللي هرجها ينعش الروح
هاك الغزال اللي عيوني اعشقته=غدالها عن جملة البيض لاموح
بالأشقر اللي قضته ثم افرقته=عن وجنة فيها لشمس الضحى ضوح
عليه قلبي يوم اوصف اشفقته=أشفق من العين الحزينة على النوح
جيته على الميعاد ليلة اطرقته=والباب لا مغلق ولاهو بمفتوح
قلت الوعاد و كل شين ابوقته=قدام لا تقفي ضعاينك و اتروح
انت اللذي وليت قلبي و عقته=قصرت شبله عن هوى كل مملوح
ليا جيت قلبي وين ما تريد سقته=و إن غبت يجري له بغيبتك ساموح
من الخجل و الخوف نجة اعرقته=ريح المذابح يشبه المسك له فوح
قبل يتعذر لي دموعه اسبقته=هو قال سامحني و أنا قلت مسموح
ثم قال أنا من مثل ما ذقت ذقته=لكن أجاحد علتي و أبعد الشوح
كم خاطرٍ من شان خاطرك ضقته=هذا و قلبي من سبايبك مجروح
كان انتحوا بي و الهدف ما لحقته=وتقطعت عنك المراسيل واشبوح
مثلي ليا من العباير اخنقته=خطرٍ عليه ايبث الأسرار و يبوح
تقولي بآخر كلامن انطقته=عسى الولي يطلق شبك روح من روح
اصبر لعل الشيخ يكتب اورقته=والله لأغني لك زغاريد و افروح
قلت آه ما مثلك تيسر اطلقته=وشلون برجي لقمتن قدم مشفوح
دنياك هذي كم وليفٍ اصفقته=من وقتنا هذا لوقت النبي نوح
ياما افتحت بابٍ و بابٍ اغلقته=وياما اسقت العشاق من سم ذحذوح
عنتر خضع لينن عبله وسقته=هذا و عنتر لأهل الخيل ناطوح
ما كنت اطيق الصبر و اليوم طقته=بالغصب ابرضى بما كتب لي على اللوح