هذا ردي على على الشاعر سعد المحمدي

هاتفني الشاعر الخلوق سعد المحمدي الذي وجدت فيه الاخلاق الساميه والقلب النقي والصدر الرحب
وكانت هذه القصيده التي امل ان تحوز على رضاءه ورضاكم:

سبقتني بالطيب ياراعي الطيب=ولاهي غريبه منك ياطيّب الساس
الطيب ماهو صعب عند الاشانيب=يسهل على ناسٍ ويصعب على ناس
كم شخص يبغى الطيب مايقدر يطيب=وده ولكن حال من دونه الياس
وكم واحدٍ جنّب عن الطيب تجنيب=ترك طريق الطيب والطيب نوماس
جيّد وجيده بس حش العراقيب=ماعنده مروة وخوة ولا احساس
لافاعلٍ طيب ولا تاركٍ عيب=نجس الفؤاد ومجلسه بين الانجاس
أهل الهروج مغثربين المشاريب=اللي لهم في ماقع الهون مجلاس
وانت الذي مثلك زبون المواجيب=طيب ولك قيمه وشيمه ولك باس
يامحمدي شرواك مابه عذاريب=لك سمعةٍ من طيبها مالها قياس
ولك في مجال الشعر عرف وتجاريب=شاعر ومتمكن ومبدع وحساس
هذا وسلم لي على خالد الذيب=اللي مواقيفه لنا ترفع الراس
الشاعر اللي له طريقة واساليب=ببحر القصيد العذب سابح وغطاس
انا اشهد انه من خيار الاصاحيب=صداقته تبعد مدى كل هوجاس
حضرة جنابه ياسعد رايه مصيب=خبير ومحنك وفاهم ونبراس
للاصدقاء قرّب حبال المقاضيب=يوم إن بعض الناس للشر مقباس
إيلاحقون من الحسد بالمشاهيب=يبغون حبل المعرفة يمرس امراس
رتّبت لك مادار بالفكر ترتيب=وسطرتها لك ياسعد فوق قرطاس
واسلم ودم مادار بالمجلس الطيب=عداد حب الرمل في وسط الاطعاس