ســــــــــــــنيــــــــــــــن العـــــــــــــــــــــمر

مرت من سنين العمر اربعيني= والله يعلم كم باقي بقية
اربع مراحل مامضى من سنيني= منها الطفولة آخذه الأسبقية
طفولتي فقدت فيها الحنيني= واقول ليت الأم ياليت حية
هذا وياكم من مرض محتويني= والوالد اتعبته بكثر الشكية
والوقت قاسي والعرب مدهريني= وابوي بحموله يقود المطية
ذي مرحلة من لغز مدفون فيني=وضحتها حسب الذي قيل لية
وذي عشر لافرحان ولاني حزيني= شباب ومراهق بليا هوية
وقتي يضيع وماش هم(ن)يجيني =غيرالأكل والشرب وإلا الاذية
ذي مرحلة فيها الجهل يعتريني= ليت الزمن يرجع لها لوشوية
والآن نبدأ وقت هزل وسميني= متخالط(ن)طيبه وخبثه سوية
لاشفت طيبه قلت ربي عويني= وخبثه لياجاني عزومي قوية
انهيتها و الحال طيب و زيني= ياليت طيب ايامها له مجية
وذي مرحلة ايامها حاكميني=من جمرها في داخلي الف كية
احزانها همي وذاتي حزيني=من وين ماجيها عليه عصية
وردت عد الماء وغيري مهيني=لي الشموس وله من البيت فية
لاصار واحد كيف احسبه ثنيني= ولاصار ميه كيف ماقول مية
وياكيف ببكي حي فالميتيني=والوقت بالاحزان خط الوصية
نبشت بعض وبعض باقي دفيني = تحت الضلوع العوج عنكم خفية
هذا العمر وإن كان باقي يبين =الله يعوضني على كل سية
دنياي ضاعت مابقى غير ديني= يالله تثبتني ليوم المنية
الحظ عاثر والليالي تعيني=وشربت صافي مرها حنظلية
من عادتي مبدي لغيري ونيني =واجامل الجلاس مبدي خطية
يسراي ماشافت عطيتة يميني =ويمناي تعطي دون رجوا عطية
ياليت وقتي للعرب يشتكيني=ونهي معاناتي بحل القضية
يالله سألتك ياعظيم اتهديني= يارب تقبلها مع اخلاص نية
ياللي قريتوها ويالسامعيني= معناي لي وحدي ولكم التحية