( فالعيد عند النّاس للأنس ميعاد=ويمتاز بطقوس الوصل والسّعاده )

هذه القصيده تشرّفت بالقائها
يوم الجمعه. 3 / 10 / 1437ه
في الاجتماع السّنوي لصّخارنه من قبيلة
الاحامده من حرب.
المقام في قرية السّديره. في منزل شيخ الضّخارنه من الاحامده.
الشّيخ / رباح بن مطلق بن عثمان ألأحمدي.
/
/
/
/
/

فالعيد عند النّاس للأنس ميعاد=ويمتاز بطقوس الوصل والسّعاده
وفرحه لمسلم صام شهره على امراد=مايخيّب الله للمجدّ اجتهاده
ويحظّى بمنزاله على دار الاجواد=عن باقي الاوطان سعده زياده
دارٍ بنعمة ربّها حضّها جاد=فيها المواطن مهتني في رقاده
يالمملكه رمز القداسه والامجاد=عليك من صفو المكارم قلاده
يحكمك حاكم صارم افعلمه وجاد=سلمان راع الحزم كفو القياده
تسلمّ ياراس العزّ من كلّ نقّاد=خذيت تاج الملك يوم الولاده
شعبك يحبّك حبّ كايد لحسّاد=وانته تحبّه حبّ زاد بوداده
حدّدت له رويا تفكّك للاعقاد= نجلك مرسّمها ومنك اعتماده
تهدف بها عيش الرّغد وامن يزداد=ومن حبّكم للشّعب جيت ابمراده
واحنا بصفّك صفّ للشّر حيّاد=ناقف بوجهه اهل الضّرر والنّكاده
اهل الزّوايا المظلمه فيهم اشراد=مايواجهون الجيش في وسط ماده
قامت تسمّم فكر فلذات الاكباد=هي تحسب التّحريض منها جلاده
فالمجتمع قامت تحرّض فالاوغاد=واللي يطاوعهم مصيره قراده
من الجهل والغيّ والدّافع احقاد=إيضنّ في قتل القرايب جهاده
ويقتل رجال الامن من غيض وقّاد=ويفخر بتفجيره لدور العباده
نفذ عليهم صبرنا علمٍ اوكاد=لازم نكسّر راس طوّل عناده
ولازم نثاري ناخذ الحقّ بجهاد=ونعلن على العدوان حرب الإباده
وفينا على ارجال الأمن حزن وحداد=ونالوا وسام الشّرف والشّهاده
واحنا قبيله بالوطن صيتنا ساد=بالطّيب والميدان يعرف جياده
منّا بصفّ الامن ضبّاط وافراد=والكلّ يفخر في حماية بلاده
واليوم في منزل له النّاس ورّاد=على الشّحم والبنّ والطيب عاده
منزال منهو للجزيلات مدّاد=رباح بن مطلق وفيه الرّياده
بالطّيب صيته نار في روس الاشهاد=وطيبه يسمّ امحاربه بالكياده
اليوم يجمعنا على حفل معتاد=ويهدف مع الجمعه تكون إستفاده
نعلن ولانا للقياده وننقاد=لوامر الدّوله بدون إنتقاده
ولحمة وطنّا مالنا غيرها امراد=ونار الحميّه ماتعوّد رماده
وياللي حفظت الأرض بجبالٍ اوتاد=ياللي خلقت النّاس لجل العباده
احفظ رجال الأمن من كلّ مرصاد=واحفظ وطنّا في دوام السّياده
وعاود علينا الأنس في كلّ الاعياد=وفيها البلد في خير وامن وسعاده

الشّاعر / خالد بن عبيد بن معتوق ألأحمدي

والنعم بالجميع
والله يعيده على الجميع باليمن والبركات اعوام عديده
صح الله السانك لاهنت

صح لسانك مليون على القصيده
والله يـعـطـيـك الـعـافيـــــــــــة
بيض الله وجهك

صح لسانك مليون على القصيده يابو عبيد
والله يـعـطـيـك الـعـافيـــــــــــة
بيض الله وجهك